ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO

por GREGORIO GÓMEZ CENTURIÓN

(PARAGUÁI RE’ÝI. CHOKOKUE HA PAINGUÉRAGUI HENDUPYRE.

KUÑA HA KUIMBA’E, JEGUAKA HA JASUKÁVA REMIANDU)

ESCUCHE EN VIVO/ LISTEN ONLINE:

 

Ñandépa máva ha’e

 

 

 

 

 

 

 

 

 

 

 

 

Ñandépa máva ha’e

Guasu Kora, diciembre - enero 1999/2000

Mávapa ha’e ñande

péicha ñañeporãndúvo

ñane ñe’ã oñopũvo

ko’ã mba’e porandu

katuĩva ñañandu

angekói haku pupúva

hesakã ha iñypytũva

héra’ỹva temiandu.

 
Ñandéko ha’e añete

pe añetehápe  ñandéva

ha ndaha’éi pe ja’éva

ñandetaha katuete

ikatu niko añete

ñande upe ñandeséva

katu ko’ãga ha’éva

upéva hína ñande.

 
Upe ñandéva jajúvo

pe are guivéma ñandéva,

ñandese, nañandeséipa

pévako ha’e ñande

ndaha’éi kuehe guare

térã, ko’ẽroja’éva

ñandetaha ha ñandéma

jepépa oime ñandese.

Ha ikatu avei ñande

upe ñandeha oje’éva

upe oje’e ha oje’éva

aipo upevaha ñande

nda’upeichaitéirõ jepe

ko’ýte nda’upeichaséirõ

katu, oje’e ha oje’érõ

ha’éma upéva ñande.

 
Ha mba’éichapo añete

ñande pe añete ñandéva

anítei pe ñandeséva

ñanderekovemonde,

nameméi jeko añete

iporã pe ñandeséva

ha iporãve pe ñandéva

ñandese’ỹrõjepe.

Ha jepépa iporãve

ta’iporãna iporãháicha

ñandéko pe ñandeháicha

ñande rupínte ñande

nda’upéichai rire ra’e

pe ñande’ỹva ñandéta

térã katu ñandeséta

ha nañandéita ñande.
 

Ñande rekove ypyrũme

ko arapýpe ñaguahẽvo,

kuarahy resa ohechávo

ñande rete chu’imi

upévoma, kangymi

ñande pype hembipéva...

upe guive... upe ñandéva

pe ñandétava, añeĩ.

 

 

Katu ndaupápei opa

oñepyrũmínte upépe

ha ipuku, térã mbykýpe

ko yvy apére jaguata

upévo ae ñaimemba

jajeapo mbegue katúpe

ha upe oguahẽva ijapýpe

ñande pórupi ohasa.

 
Ha iporã avei ja’e

nañaneañói jajeapóva

umi ñande ykére oikóva

umíva avei ñandeapo;

omyaña... ýrõ ojoko

iporãha... ivaihávo,

katu pe osẽva hu’ãvo

ñande rehéma ojeko.

 
Pe ñandeséva ha’érõ

pe ñande va’erã añetéva

ha ojuavýrõ ko ha’éva

pe “va’erãvagui”, añete,

tavahúpe jaikove

jaheka upe ñandetéva

ha jajuhúrõ upéva...

upévo... ñande, Ñande.

 

 

 

 

 

 

 

 

 

 

 

ENLACE A

ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO

por GREGORIO GÓMEZ CENTURIÓN

EN PORTALGUARANI.COM

(Hacer click sobre la imagen)

MÚSICA PARAGUAYA - Poesías, Polcas y Guaranias - ESCUCHAR EN VIVO - MP3

MUSIC PARAGUAYAN - Poems, Polkas and Guaranias - LISTEN ONLINE - MP3