Japu ja

Asunción, 2005

Japu ári reñanírõ

kabaju rari eháva

sariguégui osysyipáva

sarendy juru ryjúi

mbiriki mbirikivéró

kyre’ỹgui hembypáva

opyrũneipo yvýre

arapy rehe ipojái.

 
Japu ári rejupírõ

rema’ẽ mombyryetéva

iguyre nderehecháiva

mombyry nderesaho

yvoty nderaperãme

okukúi okukuipáva

ndejave oimépa máva

máva ahẽpa ha mamo.

Japu apére revevérõ

nderete ivevuipáva

katuĩ hechasepýva

nderehénte oñema’ẽ

ha ko’ýte upévo nde

nde añoite reñeñandúva

potapy, hendusepýva

nderete ha neñe’ẽ.

 
Japu kuápe rekañýró

nde añoite rejekuaáva

ambue katu ohecháva

jeguaka, teko porã

kele’e, ñemomorã

ndéve guará hembypáva

moñe’ẽ hendupyrãva

katuĩ ndeapysaka.

 

Japuha, japueteha

upe ndéve añeteguáva

sapy ‘ánte reñandúma

reñandútama vaicha,

katu upépe repyta

rejetu’u, reñemyatãva

japuve reipyamonáva

japúgui resẽ haguã.

Japu guýpe reñemírõ

ñandu akã kapi’i kuápe

takuru humby okápe

pukapo ndojejokói

ñesavĩ ha ño’atõi

hatiãi ndatukupépe

katu nde, vy’asaingópe

mba’eve nerehetũi.

 

Japu guýpe jaikove

ñamboykérõ añeteguáva

jahayhu ha jaipotáva

ñaroyrõ ha ñamboyke

katu upéi tenondeve

tyre’ỹ jajetopáva

mbora’e jarekoitáva

gua’upánteva ra’e.

 

Ha oiméva ko añete

upe mba’e hasyetevéva

háime háime ikatu’ỹva

marõve ñambyesaja

ndaikatúirõ jaikuaa

añete ñandépa máva,

jahayhu ha jaipotáva

ntejepéna, jaikuaa.

 

 

 

 

 

 

 

ENLACE A

ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO

por GREGORIO GÓMEZ CENTURIÓN

EN PORTALGUARANI.COM

(Hacer click sobre la imagen)

MÚSICA PARAGUAYA - Poesías, Polcas y Guaranias - ESCUCHAR EN VIVO - MP3

MUSIC PARAGUAYAN - Poems, Polkas and Guaranias - LISTEN ONLINE - MP3