ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO
por GREGORIO GÓMEZ CENTURIÓN
(PARAGUÁI RE’ÝI. CHOKOKUE HA PAINGUÉRAGUI HENDUPYRE.
KUÑA HA KUIMBA’E, JEGUAKA HA JASUKÁVA REMIANDU)
ESCUCHE EN VIVO/ LISTEN ONLINE:
Che remiandu nderehe
Táva Concepción rérape haipyre
Paĩ Rekoha Tajy, Dpto. del Amambay, mayo de 1978
Mamo piko tajuhu vy’a nde ypýpe guaréva
ko’ẽre uvei che ãhóva rasa rohechaga’u
che ñe’ã kuáre okaru angata haku pupúva
che karakúre okambúva, hípa michĩ opytu’u.
Vy’a nde ypýpe guarére ko’ẽre che mandu’áva
roñandu, rohechapáva, mamópa aipo tesarái
hi’ãnte chéve amoasãi ñe’ẽpoty iporãvéva
ndevete ipyaha pyréva ha yvytu rehe ajokuái.
Ha ikatúnga’u avei amombe’u opavavépe
che juvýva chahy’ópe, ikatúnga’u ra’e
ajéipo ma ikatuve ha amo che ára pahápe
nde reko piro’y guýpe opytu’u che rete.
Avei aguerohory kórupi ajuhu meméva
ysyry satĩ ojoasáva ha upéi ho’a ojopohéi
guyrakuéra opurahéi yvyty hovyũmbáva
ha katu che ahekavéva ko’ã mba’e ndaha’éi.
Tory hi’añetevéva teko jererovu’ỹre
popyhy kyhyje’ỹre nde ypỹpe chémi añandu
hesãivéva mborayhu teko potĩgui opupúva
nde ypýpe mante ikatúva ko’ã mba’e jajuhu.
Nderehe che mandu’árõ opaite chepirĩmbáva
ajéipo oguahẽ upe ára nde ypýpe aikomi jevy
upérõ ko vy’a’ỹ che ñe’ãkuágui ovevéne
ha marovéma anichéne che rekovépe ojevy.
Ne memby che añeñandu jepevérõ mombyry
Nde távagui upe che sy ko yvy ári chereru
ha upeháre mborayhu hesãi ha ijasukapáva
che ága oañuãmbáva; ñe’ẽyvotýrõ amosũ.
