ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO
por GREGORIO GÓMEZ CENTURIÓN
(PARAGUÁI RE’ÝI. CHOKOKUE HA PAINGUÉRAGUI HENDUPYRE.
KUÑA HA KUIMBA’E, JEGUAKA HA JASUKÁVA REMIANDU)
ESCUCHE EN VIVO/ LISTEN ONLINE:
Mborayhu pyahẽ
Arturo Bernal rérape
Asunción, mayo de 1976
Aña rembiguái korasõ ita py’aro meméva
mboriahu ruguýpe oimo’ãomboguéta mborayhu rata
ndoikuaái ha’e peteĩ ojukárõ mbovýpa opu’ãne
ko tape pyahu iñepyrũmbý’va omyatãva’erã.
Ojepo’api aña rembiguái añete oimo’ãrõ
ñemongyhyjépe omosarambíta tekove joaju
japu ky’aita omyapamonáva nañamokõvéima
hetave akãme hendypu jepéma tesakã arandu.
Hesa rendypáne aña rembiguái py’a tarovágui
ha ijuru huguýne hi’ãitereígui ñanembotavy
ha katu ñande peteĩ ha’ỹi nañamokóichéne
japaymi jepéva jaikuaapaitéma ivaraha guy.
Ha oikorãngue ku ko’ẽreíre py’a rayẽpópe
omosarambívo maymave yvytúre ñe’ẽ tarova
iporãitevéne ojere mba’érõ oñoña ivokópe
ñande mboriahu ndaja’usevéima japu apesã.
Tomoinge porãke aña rembiguái iñakã hy’ápe
Mborayhu rendy araka’eve ndoguemo’ãiha
ndohupytyichéne ondyvu haguã kuarahy rováre
ha upéicha avei nomondohóichéne joayhu tymasã.
Ikatu añete aña rembiguái pochy tarovápe
oguahẽ rupi py’aro pahápe ndojejokovéi
ha ojukarei tesa ypytũme heta tapichápe
katu upevére mborayhu reko ndogueviva’erãi
Guarani ra’y tetã ha Tupã jahayhu añetéva
Kuarahy ratáicha omimbi ñandeve tembiapopyrã
pe tekojoja ha tekoguapy rupyty ra’ãvo
kyhyje’etére ñande rekove ñame’eva’erã
ENLACE A
ÑE’Ẽ - POEMARIO EN GUARANI PAĨ, GUARANÍ PARAGUAYO Y CASTELLANO
por GREGORIO GÓMEZ CENTURIÓN
EN PORTALGUARANI.COM
(Hacer click sobre la imagen)
MÚSICA PARAGUAYA - Poesías, Polcas y Guaranias - ESCUCHAR EN VIVO - MP3
MUSIC PARAGUAYAN - Poems, Polkas and Guaranias - LISTEN ONLINE - MP3
