ÑEMBO’E ÑAMANDÚPE/ GUYRA'I RORY ATY/ 

PARAGUÁI, PARAGUÁI, PARAGUÁI.

Poesías en guaraní de ZENÓN BOGADO ROLÓN

ÑEMBO’E ÑAMANDÚPE

Ñamandu,

che Ru arave’ỹ mboypyrigua,

pytũ yma mboyve guare.

Che Ruvusuete,

mba’étepa ko oikopáva

yvy, ore Sy rova ári.

Ñande yvy oñemongorapy;

oñemumba hese ava’ỹ,

ñande ka’aguy ojeity,

ojeity, ojeitypa.

Ñande y ojejoko,

ojepuru,

oñembo’ai,

ojererova,

oñembohypa.

¡Che Ruvusu tenondete!

Mba’e toiko orehegui,

yvy oñemboka'y,

ka’aguy ojehapy

ha y oñemboka’y.

¡Che Ru Ñamandu!

Mba’éicha toikoveve,

mba’éicha ikatu ndokyhyjéi,

mamóipo ikatúne ohove

mymba ha pira pahaguemi.

Ka’i,

tapiti,

kure’i,

mborevi,

guasu’i,

kapi’yva

ha tatu hũ.

Ynambu,

jeruti,

chahã ha jaku,

tukã’i ha gua’a

ha umi piky rory aty.

Jaguaretéma katu

javorái hendaguã.

Okaipa, hatatĩ,

tanimbu ojaty.

¡Che ru Ñamandu!

Mba’e oikopa orehegui,

mbairy ore mboaparipy;

kuaavenda te’õ korápe,

ropyta roka’uvu.

Ndaha’evéi, upe ava

ka’aguy sã’ỹmegua.

¡Che ru Ñamandu!

Mba’e oikopóta orehegui.

Nde ra’y ñemoñare niko ore,

nde año añoite mante reikuaa

tenonde orevegua.

¡Che Ru Arave’ỹ mboypyrigua!

¡Che Ru pytũ yma mboyve guare!

¡Che Ru vusu tenondere!

¡Che Ru vusu Ñamandu!

GUYRA’I RORY ATY

Guyra’i maymaite

purahéipe hyvíva,

pembogue pyhare ahy’o,

jejuvy,

jahe’o,

rata’y

ñembyaty,

rendypa

kumberéi.

Ko’ẽtĩ rendyña ñembokípe,

yvytu peposỹi pytuhóre

pepoi ñe’ẽ pukahýi.

Peimeha yvyra rakãita,

rogue’etaite ypytũ,

tape yke jeguaka,

torýgui okacha jerojy

ha oime asyngue

ohasa tindymi kirirĩva,

oikove porandúpe:

Mamópa peẽ pejuhu

yvyra rakãita,

roque rovyũ,

kumaku, heropy.

Ore rojuhu,

roke,

ropáy,

roñe’ẽ,

roveve,

rojerojy,

rokaru,

roy’u,

roñembo’e

ha rojapógui akói

Ñamandu remiandu.

Aipórõ eremi ne asynguépe

toike hekove korapýpe

ha toho ka’aguýpe

toheka hekoha ha heko;

tojuhu mba’e imba’e:

Ku vy’a,

ñyrõ’ỹ,

py’apy

ha ñe’ã.

Pytu’u,

sãve’ỹ arapy rembe’y.

PARAGUÁI, PARAGUÁI, PARAGUÁI

Paraguái, Paraguái, Paraguái,

guaraníme akói rohenói;

pyhare mbaraka aikarãi,

purahéi ndeveguáva ndosói.

Paraguái, Paraguái, Paraguái,

ne rendápe hi’ãnte aha,

pore’ỹ ñanandy javorái,

nderechavo topa ijoha.

Paraguái, Paraguái, Paraguái,

yvoty nemba’e tahetũ;

nde yvu hesatĩva hesãi,

pytu’u ichugui tamboy’u.

Paraguái, Paraguái, Paraguái,

ne rymba purahéi tahendu.

Yvytu piro’y tomyasãi;

che retére vy’a ko’ẽju.

Paraguái, Paraguái, Paraguái,

nde ra’y chokokue tahecha,

kuarahýpe oiméne hikuái,

oikove mba’apo ry’aipa.

Paraguái, Paraguái, Paraguái,

ne tapỹime che sy ndopukái,

ndahavéigui ha’e ndovy’ái,

cherenói nde jave Paraguái.

Fuente:

ÑE’ẼPOTY ATY – VOCES DE POETAS EN GUARANÍ

Por FELICIANO ACOSTA y NATALIA KRIVOSHEIN DE CANESE

Editorial Servilibro,

 Asunción-Paraguay 2005