|
MARIO RUBÉN
ALVAREZ BENITEZ
|
|
|
|
JEPYTE / ÑE’Ẽ RA'ARÕVO - Poesías en MARIO RUBÉN ÁLVAREZ - Año 2005
|
|
|
JEPYTE/ ÑE’Ẽ RA'ARÕVO
Poesías en MARIO RUBÉN ÁLVAREZ
JEPYTE
Oipyte ha oipyte
hapicha ry’ái,
hapicha pire,
hapicha ruguy.
Jasy oke mboyve,
kuarahy opa rire,
oipyte ha oipyte.
Hapicha resa
huguaitépe oñotỹ;
hyére okakuaa ipuru’ã
ha oipyte ha oipyte.
Kane’õ réra ichugui hesarái,
oñani, iñakuã,
ohupyty katuete hapicha.
Ijuru ipukupáma,
hova ojekáta katuete,
okambu ha’eichaguáre,
ára reíre ho’óre okaru.
Oipyte ha oipyte,
omboypáma ko tetã.
ÑE’Ẽ RA’ARÕVO
Toúna ñe’ẽ
ñane retã apére toguata,
óga kapi’ípe toguahẽ,
táva guasu tohuguatĩ,
toy’u ysyry satĩ me,
topytu’u yvyra guýpe,
opórupi taisarambi.
Toikuaa ñembyasy rova,
tomyendy vy’a rata,
tomombarete mborayhu,
toikytĩ kyhyje sã,
tomoirũ py’aguasu,
mitã resa tomokã.
Kyse ha mboka tomuña,
tomyakã purahéi,
ñaña, ruguái toisu’u.
Toúna ñe’ẽ,
ára pyahu togueru.
Tomondoho tesay,
tombogue py’arasy,
tombopuka panambi,
tomoheñói ko’ẽ pepo.
Toúna ñe’ẽ
ha kirirĩ pukuete pytũ
toso, topa, tomanoite.
Fuente:
ÑE’ẼPOTY ATY – VOCES DE POETAS EN GUARANÍ
Por FELICIANO ACOSTA y NATALIA KRIVOSHEIN DE CANESE
Editorial Servilibro,
Asunción-Paraguay 2005
ENLACE INTERNO A ESPACIO DE VISITA RECOMENDADA
EL IDIOMA GUARANÍ, BIBLIOTECA VIRTUAL en PORTALGUARANI.COM
(Hacer click sobre la imagen)
|
Bibliotecas Virtuales donde se incluyó el Documento:
Leyenda: |
|
Solo en exposición en museos y galerías |
|
Solo en exposición en la web |
|
Colección privada o del Artista |
|
Catalogado en artes visuales o exposiciones realizadas |
|
Venta directa |
|
Obra Robada |
|
|
Buscador PortalGuarani.com de Artistas y Autores Paraguayos
|
|
|