FERIAS DE ADVIENTO
17 AL 24 DE DICIEMBRE
LECTURAS EN IDIOMA GUARANÍ
COMPAÑÍA DE JESÚS - JESUITAS DEL PARAGUAY
Estas lecturas se emplean desde el día 17 al 24 de diciembre. Las lecturas del día que ocurre en domingo se omiten; pero pueden ser asumidas o anticipadas cualquier otro día, principalmente en vez de las lecturas que, en este ciclo, se leen en el domingo.
17 DE DICIEMBRE
KUATIAÑE’Ẽ GÉNESISPE OĨHÁICHA 49, 1-2. 9-10
Jacob ohenói ta'ýra kuérape ha he'i kóicha:
Pejupa che ypýpe ko'ápe, ha ta'e ojehútava peẽme,
Peko'íke Jacob ra'ykuéra, pende ru Israélpe pehendu!
Judá, nde ryvykuéra ne momba'éta,
nde rehe ija'e'ỹva ajúra nde pópe rejopýta,
ha umi nde ryvykuéra ndéve oñakãitýta.
León ra'y rusuhína Judá, tymba ka'aguy ojuka rire,
ojeity yvýpe ha opytu'u.
Upépe ha'e oĩ aja, mávapa ijypýpe oñembojáne!
Ani chéne oĩ oipe'áva Judá pokatu ipógui.
Avave nomongúi chéne chupe iguapyhágui.
Upéinte oúne ijára, ha ojayvýne henondépe
tetãnguéra yvy arigua.
Tupã Ñandejára ñe’ẽ.
SALMO 71, 1-4ab. 7-8. 17
TUPÃ, EME'Ẽ MBURUVICHA GUASÚPE TEKOJOJA
Tupã, eme'ẽ mburuvicha guasúpe tekojoja
ha mburuvicha guasu ra'ýpe teko potĩ,
ikatu haguãicha ne retã oisãmbyhy hekopete,
ha imboriahúvape ohecha kuaa.
Py'a guapy ha tekojoja yvytýgui toguejy ne retãgua ári.
Mburuvicha guasu toñangareko imboriahúvare,
tohecha kuaa imboriahúva mitã nguéra
Hetãme tojeiko hendapete ha hetã toisãmbyhy jasy oñehundi peve.
Peteĩ yguasúgui ambue peve upe yvy toĩ ipo guýpe,
Éufrates ysyry guive yvy opaha peve.
Mburuvicha guasu réra topa'ỹ araka'eve,
taherakuã kuarahy oñehundi peve.
Tetãnguéra tojehovasa ipo rupi, ha umíva tombovy'a chupe.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA
Mt 1, 1-17
Ko'ãva hína umi Jesucristo ypykue. Ha'e David ha Abraham ñemoñare vaekue.
Abraham, Isaac ru vaekue; Isaac, Jacob ru ha Jacob katu Judá ha tyvýra kuéra ru. Judá, Fares ha Zérah ru, ha isy kuéra Tamar. Fares, Esrom ru; Esrom, Aram ru; 4 Aram, Aminadab ru; Aminadab, Nahasón ru; Nahasón, Salmón ru; Salmón, Booz ru, ha Booz sy Rahab. Booz, Obed ru ha isy katu Rut. Obed, Jesé ru, ha Jesé, mburuvicha guasu David ru. David, Salomón ru ha isy katu Urías rembirekore.
Salomón, Roboam ru vaekue; Roboam, Abías ru; Abías, Asá ru; Asá, Josafat ru; Josafat, Joram ru; Joram, Ozías ru; Ozías, Jotam ru; Jotam, Ahaz ru ha Ahaz, Ezequías ru. Ezequías, Manasés ru; Manasés, Amón ru; Amón, Josías ru. Josías, Jeconías ha tyvýra kuéra ru. Upérõ Israelgua kuéra ojereraha vaekue tembiguái ramo Babilóniape.
Upe rire, ou vaekue Salatiel, Jeconías ra'y. Ha'e Zorobabel ru vaekue. Zorobabel katu Abihud ru; Abihud, Eliaquim ru; Eliaquim, Azar ru. Azar, Sadoc ru; Sadoc, Aquim ru; Aquim, Eliud ru; Eliud, Eleazar ru; Eleazar, Matán ru; Matán, Jacob ru. Jacob, José ru; ha José María ména. María hína, Jesús hérava Cristo, sy.
Upéicha jajuhu oĩha 14 ñemoñare Abraham guive David peve; ha 14, David guive Israelgua Babilóniape ojereraha ramo guare peve; ha 14 avei upe guive, ou peve Cristo.
Ñandejára Jesucristo Ñe’ẽ.
18 DE DICIEMBRE
KUATIAÑE’Ẽ JEREMÍAS OHAIVA’EKUE 23, 5-8
Ñandejára he'i:
“Oúta ára ha che rupi
David oguerekóta peteĩ iñemoñare tee, peteĩ oisãmbyhýtava hekopete,
tekojoja ha teko hekopegua oiporútava ko tetãme.
Ha'e oisãmbyhy aja, Judá ndokyhyje mo'ãi mba'evégui
ha Jerusalén oikóta py'a guapýpe.
Oñembohérata kóicha: ‘Ñandejára ñane myakã rapu'ã.’”
Ñandejára he'i: “Oúta ára nome'ẽ mo'ã veimaha hikuái iñe'ẽ he'ívo: ‘Ñandejára rérape, oguenohẽva’ekue Israelgua Egíptogui’, ome'ẽta uvei iñe'ẽ he'ívo: ‘Ñandejára rérape oguenohẽva’ekue Israel ñemoñarekuérape tetã yvate gotyogui ha opa tetã nguéragui omosarambi hague rupi chupekuéra.’ Ha oikóta hetã teépe.”
Tupã Ñandejára ñe’ẽ.
SALMO 71, 1-2. 12-13. 18-19
TUPÃ, EME'Ẽ MBURUVICHA GUASÚPE TEKOJOJA
Tupã, eme'ẽ mburuvicha guasúpe tekojoja
ha mburuvicha guasu ra'ýpe teko potĩ,
ikatu haguãicha ne retã oisãmbyhy hekopete,
ha imboriahúvape ohecha kuaa.
Ha'e oguenohẽta imboriahúvape
ojerure vove chupe jejopy vaígui,
ha oikotevẽvape ndorekóiva mamo oho haguã.
Oiporiahurerekóne imboriahúvape
ha chupe oguenohẽne jejopy vaígui.
Toñemomba'e guasu Tupã Israel Jára,
ha'e añoite mba'e hechapyrãva ojapo.
Héra toñemomba'e opa árape,
ha imimbikue tomyenyhẽ ko yvy.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA
1, 18-24
Jesucristo oúramo guare kóichava’ekue: Isy María ome'ẽma iñe'ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba'e ijoheipyréva, nomoherakuã vaiséi chupe. Oheja reise mo'ãnte chupe, avave oikuaa'ỹre. Ko'ã mba'e ombojere aja iñakãme, ojehechauka chupe iképe Ñandejára remimbou, ha he'i chupe:
José, David ñemoñare, ani rekyhyje reraha haguã ne rembirekorã Maríape. Pe mitã ha'e oguerekótava niko Espíritu Santo pu'aka rupi ou. María imembýta ha rembohérata pe mitã Jesús. Ha'e hína upe oguenohẽtava hetã guápe hembiapo vaikuégui.
Ko'ã mba'e ojehu oiko haguã hekoitépe upe Ñandejára he'iva’ekue maranduhára rupi: “Kuñataĩ imarã'ỹva hye guasúta ha imemby kuimba'éta.
Oñembohérata Emanuel, (he'iséva “Tupã ñane ndive”).”
José opáyvo, ojapo Ñandejára remimbou he'i haguéicha chupe, ha ogueraha hembirekorã Maríape. Oiko'ỹre oñondive imemby, ha José ombohéra Jesús.
Ñandejára Jesucristo Ñe’ẽ.
19 DE DICIEMBRE
KUATIAÑE’ẼJUECESPE OĨHÁICHA 13, 2-7. 24-25a
Táva Sorápe oiko vaekue peteĩ kuimba'e hérava Manoa. Ha'e Dan ñemoñarekuérava. Hembireko ndaikatúi imemby. Ko kuñakaraípe ojehechauka Tupã remimbou ha he'i chupe:
Ndaikatúiva ne memby na ne membýiri. Ko'ágã katu nde rye guasu ha ne membýta peteĩ mitã kuimba'e. Anivétei re'u vino térã oimeraẽ mba'e ne monga'úva ha anítei re'u mba'eve ipotĩ'ỹva. Ko mitã akã rague nereikytĩ mo'ãi. Ha'e oñemboyke Tupãme guarã oikove ypy mboyve guive. Ha'e oguenohẽ ñepyrũta Israel ñemoñarépe filisteokuéra po guýgui.
Oho upe kuñakarai he'i iménape: “Oñemboja che rendápe peteĩ kuimba'e ha'ete vaicha chéve Tupã remimbou. Tuicha che mondýi ha naporandu jepéi chupe moõguipa ou. Ha'e avei nde'íri chéve mba'éichapa héra.
Imemby upe kuña ha ombohéra upe mitã kuimba'e Sansón. Upe mitã okakuaa ha Tupã ohovasa chupe. 25 Tupã pu'aka oñeñanduka ñepyrũ hete pýpe
SALMO 70, 3-4a. 5-6ab. 16-17
TUPÃ, CHE PE'A UMI HEMBIAPO VAÍVA PO GUÝGUI,
Nde upe reñangarekóva che rehe,
nde guýpe añemo'ã
ha nde che renohẽ jejopy vaígui.
Ndehína upe che rehe reñangarekóva
ha upe che mo'ãva.
Tupã, che pe'a umi hembiapo vaíva po guýgui,
Nde rehénte voi Tupã che mitã guive ajerovia,
nde rehénte voi ajeko.
Che sy ryépe aime ramo guare
upe guivéma voi nde rehe ajeko.
Nde upe che renohẽva’ekue che sy ryepýgui
Amoherakuãne
umi mba'e tuichaite rejapo vaekue Ñandejára.
Amoherakuãne nde añonteha upe nde reko jojáva.
Tupã, che mitã rusu guive niko
nde che reko mbo'e ha ko'ágã peve
amombe'u umi mba'e tuichaite nde rejapova’ekue.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
1, 5-25
Herodes mburuvicha guasúrõ guare Judápe, oikova’ekue peteĩ pa'i hérava Zacarías, pa'i ñemoñare Abías rehegua. Hembireko, hérava Isabel, Aarón ñemoñare. Mokõivéva hekojoja Tupã renondépe, ha ojapóva hekópe Ñandejára rembipota ha hembiapoukapy. Nda ita'ýraiva hikuái, ndaikatúigui Isabel imemby. Upéi ave, mokõivéva ituja itereíma. Peteĩ jevy, pe pa'i aty omyakãva Zacarías, hembiaporã guahẽ javehína Tupaópe, Tupã renondépe, ojapoháicha pa'ikuéra, Zacarías oike pe koty marangatúpe ohapývo insiénso Tupã renondépe. 10 Otĩmbo aja pe insiénso opavave okápe oñembo'e joa. 11 Upe javete ojehechauka sapy'a Zacaríaspe peteĩ Ñandejára remimbou, oñembo'y pe altar insiénso ojehapyha akatúavo. Ohechávo pe Tupã remimboúpe, Zacarías opyta ijurujái ha okyhyjeterei.
Pe Tupã remimbou katu he'i chupe: Zacarías, ani rekyhyje. Tupã ohendu ne ñembo'e. Ne rembireko Isabel imembýta, ha rembohérata Juan. Nde revy'aitereíta, ha heta oiméta oguerohorýva nde ra'y ou hague yvy ári. Nde ra'y mba'e guasúta Ñandejára renondépe. Ha'e ndo'u mo'ãi vino térã vino yvaguigua, ha Espíritu Sántogui henyhẽta, ko yvy ári ou mboyve guive. Ha'e rupi heta Israelgua ojevýta Tupã Ijárape. Juan oúta Ñandejára renonderã, Elías espíritu ha ipokatu reheve, omoingo porã haguã túvakuéra ta'ýrakuéra ndive, ha umi iñe'ẽ rendu'ỹva oikuaa haguã mba'éichapa iñe'ẽ renduva’erã. Ha péicha ombosako'íta Israel guápe ojerovia haguã Ñandejára rehe. 18 Zacarías oporandu pe Tupã remimboúpe: Mba'éicha piko aikuaa porãta upéva? Ché che tujáma ha che rembireko ave iguãiguĩma. Tupã remimbou he'i chupe upépe:
Che hína Gabriel, aiméva Tupã renondépe. Ha'e che mbou ame'ẽ haguã ndéve ko marandu porã. Ha ko'ágã, ndereroviái haguére ko'ã mba'e ha'éva ndéve, ne ñe'ẽngúta, oikopa peve opa mba'e. Upe aja, opavave oha'arõva okápe Zacaríaspe, oporandu joa ojupe mba'érepa hi'areterei Tupao ryepýpe. Ha osẽvo, Zacarías ndaikatúi oñe'ẽ chupekuéra. Upépe ohecha kuaa hikuái oiméne haguã imba'e recha ra'e pe Tupao ryepýpe. Zacarías ipo ha iñakã mante ombovava oikuaauka haçue he'iséva, ha péicha opyta iñe'ẽngu. Ha ojapopávo hembiapo, pa'i Zacarías oho hógape. Ko'ã mba'e ojehu rire, hembireko Isabel hye guasu, ha 5 mése aja nosẽvéi hógagui. He'i ijupe: “Ñandejára ojapo che rehe kóicha, anive haguã avave ojahéi che rehe”.
Ñandejára Jesucristo Ñe’ẽ.
20 DE DICIEMBRE
KUATIAÑE’Ẽ ISAÍAS OHAIVA’EKUE 7, 10-14
Ñandejára he'i avei Aházpe: “Ejerure Tupã nde Járape tojapo techapyrã mba'e rechaukaháramo, yvyguy hypyvehápe, térã yvate ijyvatevehápe.”
Ahaz he'i: “Nda py'a ra'ã mo'ãi Ñandejárape ajerurévo mba'e rechaukaha.”
Upérõ Isaías he'i: “Pehendu peẽ mburuvicha guasu
David róga pegua: Hesa'i gueteripa peẽme pemokane'õ yvypóra kuérape,
ajeve pemokane'õséma avei che Tupãme?
Ñandejára voi ome'ẽa peẽme mba'e rechaukarã;
Pe kuñataĩ hye guasu ha imemby mitã kuimba'éta, ombohératava Emanuel.
Tupã Ñandejára ñe’ẽ.
SALMO 23, 1-4ab. 5-6
KO YVY NIKO ÑANDEJÁRA MBA'E, OPA MBA'E IPYPE OĨVA.
Ko yvy niko Ñandejára mba'e,
opa mba'e ipype oĩva, ha opa mba'e ipype oikóva.
Ha'e upe yvy omopyendava’ekue,
yguasu ha ysyry ári omboguapy.
Mávapa ojupíne Ñandejára yvytýpe?
Mávapa opytáne itupao marangatúpe?
Umi ipo ha ipy'a ipotĩva
ha ojeíva opa mba'e vaígui,
Umívape ohovasa Tupã Ñandejára,
ha oguenohẽ chupekuéra jejopy vaígui.
Upéichako umi Ñandejárare ojeroviáva,
umi Jacob Tupã rendápe oguahẽva
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
1, 26-38
Ha 6 mése haguépe, Tupã omondo hemimbou Gabriélpe peteĩ táva Galilea pegua hérava Nazarétpe. Upépe oiko María, peteĩ kuñataĩ marã'ỹ, ome'ẽmava’ekue iñe'ẽ omenda haguã Josére, mburuvicha guasu David ñemoñare. Tupã remimbou oike pe María oĩháme ha he'i chupe:
Roguerohory, nde Tupã rembiporavo! Ñandejára oĩ ne ndive. María ipy'andýi opytávo, ha oñeporandu mba'énepa he'ise pe maitei ne upéva. Tupã remimbou he'i chupe: María, ani rekyhyje, Tupã nde rerohory. Nde rye guasúta ha ne membýta, ha pe mitã rembohérata Jesús. Ha'e mba'e guasúta ha oje'éta hese: “Tupã Yvatetegua Ra'y”. Ha Tupã Ñandejára ojapóta chugui mburuvicha guasu, ijypykue Davídcha. Ha'e oisãmbyhýta Jacob retã guápe opa árape guarã.
María oporandu pe Tupã remimboúpe: Mba'éicha piko ojehúta upéva, ko che ndaikóiva gueteri kuimba'e ndive?
Tupã remimbou katu he'i chupe: Espíritu Santo oikéta nde pype, ha Tupã Yvatetegua pokatu oúta nde ári. Upévare, pe mitã oútava oñembohérata Imarangatúva ha Tupã Ra'y. Isabel, nde rogaguáva, imembýta avei, iguãiguĩmaramo jepe. Pe kuña oje'eva’ekue ndaikatuiha imemby, ojapóma mése hye guasuha. Tupãme guarã ndaipóri ikatu'ỹva.
Aipórõ María he'i: Che, Ñandejára rembiguái. Tupã tojapo che rehe pe ere haguéicha. Ha upéi, pe Tupã remimbou oho.
Ñandejára Jesucristo Ñe’ẽ.
21 DE DICIEMBRE
KUATIAÑE’Ẽ CANTARESPE OĨHÁICHA 2, 8-14
Péina ou che rembiayhu.
Ahendúma iñe'ẽ.
Opo oúvo umi yvytýre.
Che rembiayhúko ku guasúicha,
ku guasu pytã ra'y rusúicha.
Péina oiméma okẽ kupépe.
Ovetãme iñakãsẽma,
ha upe rupi oma'ẽ.
Che rembiayhu he'i chéve:
“Epu'ã che rayhupára.
Eju jaha, che yvoty.
Na ema'ẽ! Ro'y ohasáma.
Hendive ama ohopa.
Ñúme yvoty heñóima.
Japurahéiha ára oguahẽma.
Ñahendúma ñande yvýpe
opurahéirõ jeruti.
Ígo hi'áma, ha parralty omyasãi
hyakuãngue.
Epu'ã, che rayhupára.
Eju jaha, che yvoty.
Nde, che pykasumi rekañýva ita apytépe,
rejaitypóva ijyvatevehápe:
Eheja tahechami pe nde rova,
tahendu pe ne ñe'ẽ he'ẽtéva,
tahecha pe nde rova iporãitéva.”
Tupã Ñandejára ñe’ẽ.
Téra:
KUATIAÑE’Ẽ SOFONÍAS OHAIVA’EKUE 3, 14-18a
Epurahéi Jerusalén, esapukái vy'águi Israel retã, evy'a Jerusalén!
Evy'a nde py'aite guive!
Ñandejára ndaipochy véima ne ndive, omosẽma nde rehe ija'e'ỹvape.
Tupã Israel ruvicha nde pype oĩ.
Ndojehu mo'ãvéi mba'eve ivaíva.
Upérõ Jerusalénpe oje'éta: “Ani rekyhyje Sión,
térã reheja nde jyva ikangy!”
Tupã nde Jára oĩ nde pype, ha'e imbarete ha ne mo'ãta!
Ñandejára ovy'a ne ndive.
Imborayhúpe ne moingove pyahúta.
Ovy'a ha opurahéita nde pýri, ojevy'aháicha arete jave.
Tupã Ñandejára ñe’ẽ.
SALMO 32, 2-3. 11-12. 20-21
PEMOMBA'E GUASU ÑANDEJÁRAPE
Pemomba'e guasu Ñandejárape mbaraka púpe,
árpa púpe, pepurahéi chupe.
Purahéi pyahu pehenduka chupe.
Pembopu porãke ha peguerosapukái chupe.
Umi mba'e Ñandejára ojaposéva katu
ndopa reíri chéne araka'eve.
Ovy'a upe tetã oguerekóva Tupãme ijára ramo,
upe tetã ha'e oiporavova’ekue imba'e teerã.
Ñandejára rehe ore rojerovia.
Ha'e upe ore pytyvõ ha oñangarekóva ore rehe.
Ñandejára ore mbopy'a rory
ha héra marangatu rehe rojerovia.
Ñandejára, ne mborayhu ta ore añuãmba.
Upéva roha'arõ nde hegui.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
1, 39-45
Umíva umi árape, María oho pya'ete peteĩ táva, Judá pegua yvytýpe, ha oike Zacarías rógape ha omomaitei Isabélpe. Ohendúvo pe María maitei, Isabel oñandu omýi pe mitã hyépe, ha Isabel henyhẽ Espíritu Sántogui. Ha upépe, oñe'ẽ hatãvo he'i: Tupã nde rovasave opa ambue kuñágui, ha ohovasa ne memby! Máva piko che ou haguã che rendápe che Jára sy? Ahendúvo ne maitei, che memby omýi vy'águi che ryépe. Revy'aiténe nde reroviava’ekue oikotaha opa mba'e Ñandejára he'iva’ekue ñandéve.
Ñandejára Jesucristo Ñe’ẽ.
22 DE DICIEMBRE
KUATIAÑE’Ẽ PETẽIHA SAMUELOHAIVA´EKUE 1, 19b-20. 24-28
Upéi Elcaná oñeno hembireko Ana ndive ha Tupã imandu'a Ana rembijerurére. Péicha Ana opyta hye guasu. Ha oñembotývo hi'ára,imemby peteĩ mitã kuimba'e ha ombohéra chupe Samuel, ojerure haguére Tupãme.
Pe mitã nokambuvéi rire, ogueraha chupe tupao Sílope. Ogueraha avei mbohapy tóro ra'y, 22 kílo trígo ha peteĩ vino ryru. Imemby imitã gueteri upérõ. Ojuka rire pe tóro ra'y ogueraha hikuái pe mitã pa'i Elípe. Ha Ana he'i chupe: Nde karai, che niko pe kuña añembo'eva´ekue
Ñandejárape nde ypýpe ko tupaópe. Ajerureva´ekue chupe ome'ẽ haguã chéve peteĩ mitã. Kóva ha'e. Upévare aru ame'ẽ chupe imba'erã, ha oikove aja oikóta hendive omba'apóvo chupe itupaópe.
Upéi oñesũ hikuái Ñandejára renondépe.
Tupã Ñandejára ñe’ẽ.
SALMO 1 Sam 2, 1. 4-8abcd
TUPÃ, CHE PY'AITE GUIVE ROGUEROVY'A
“Tupã, che py'aite guive roguerovy'a,
nde che mombarete pyahúgui.
Umi che rehe ija'e'ỹvare che yvytu,
nde che pytyvõ haguére avy'a rasa.
Ha'e omopẽ umi ipy'a guasuvéva hu'ykuéra,
ha umi ikangývape ha'e omombarete.
Umi hyvatã va´ekue,
ko'ágã ochanga tembi'u rembyrére,
ha umi iñembyahýi va´ekue , ko'ágã hyguãtãmba.
Kuña ikatu'ỹva´ekue imemby, ko'ágã 7 imemby,
ha pe imemby retava´ekue , ko'ágã icha'ĩmba.
Ñandejára oporojuka ha oporomoingove,
ñane mboguejy pe yvy kuápe, ha upégui ñane renohẽ jevy.
Ñandejára ñane momboriahu,
térã heta mba'e ome'ẽ ñandéve;
ha'e ñande reity, ha ñane mopu'ã jevy.
Tupã omopu'ã mboriahúpe yvýgui,
ha yty apytégui mba'eve oguereko'ỹvape,
poguasu ykére chupe omboguapy,
ha ijyvatevehápe chupe omohenda
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
1, 46-55
María he'i:
Che ánga oguerohory Ñandejára ipu'akapávape;
che espíritu hory Tupã, che pysyrõhára ndive
Tupã omoĩ hesa che, hembiguaimíre,
ha águi rire opa ára añehenóine ovy'áva;
pe Ipu'akapáva ojapógui mba'e guasuete che pype.
Héra imarangatu!
Tupã oiporiahurereko opa ára umi chupe omomba'e guasúvape.
Ipokatu oiporu, ohundi umi ojejapóva rembiapo,
omongúi iguapyhágui umi mburuvicha guasúpe,
ha ohupi heko mirĩvape.
Omyenyhẽ mba'e porãgui umi iñembyahýivape,
ha po nandi omondo umi imba'e retávape.
Oipytyvõ hembiguái Israélpe, ha ndahesaráiri
oiporiahurereko haguã, ha'e oñe'ẽ me'ẽ haguéicha
ñande rukuéra ypykue Abraham ha iñemoñarépe.
Ñandejára Jesucristo Ñe’ẽ.
23 DE DICIEMBRE
KUATIAÑE’Ẽ MALAQUÍAS OHAIVA´EKUE 3, 1-4. 23-24
Ñandejára ipu'akapáva he'i: “Amondóta che rembijokuái ombasako'i haguã che raperã. Pende Jára peẽ pehekáva oikéta itupaópe. Oguahẽma pe oñemboúva ha ogueru pe ñe'ẽ me'ẽ peẽ peipotáva!”
Ha mávapa ikatúne ogueropu'aka upe ára? Mávapa ikatúne opyta ñembo'yhápe? Oguahẽta tatáicha ñane mopotĩ haguã. Ha'éta havõicha oipe'áva ky'a ñande hegui. Ñandejára oguapýta omopotĩ haguã pa'ikuéra, Leví ñemoñare, oñemopotĩháicha pláta ha óro tatápe. Upéi ha'ekuéra ikatúta omba'e kuave'ẽ hekópe Ñandejárape. Upérõ Ñandejára oguerohorýta Judá ha Jerusalén mba'e kuave'ẽ oguerohory haguéicha ymave.
Pema'ẽ, amboúta peẽme maranduhára Elías, oguahẽ mboyve Ñandejára ára. Upévatahína ára nde tuicháva ha ojekyhyje etereiha! Ha'e omoingo porãta túva ta'ýrakuéra ndive. Upeicha'ỹramo, ajúta ainupã hetã ha ahundietéta.”
Tupã Ñandejára ñe’ẽ.
SALMO 24, 4-5ab. 8-10. 14
TUPÃ, EHECHAUKA CHÉVE UMI NDE RAPE
Tupã, ehechauka chéve umi nde rape,
ha umíva rupi che sãmbyhy.
Che mbo'e umi mba'e añete guáva.
Ndéko hína che Jára, Ñandejára niko imba'e porã
ha imarangatu, upévare oheko mbo'e heko vaívape.
Imboriahúvape oisãmbyhy ani haguãtei ojavy,
ha hapére chupekuéra omboguata.
Ñandejára rape kuéra niko mborayhu ha teko jerovia,
ko'ã mba'e ohupyty umi hembiapoukapy ojapóvape.
Ñandejára ojehayhuka umi chupe omomba'évape,
ha chupe kuéra oikuaauka hembiapoukapy.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
1, 57-66
Ha oguahẽvo ára imemby haguã, Isabel ogueru yvy ári peteĩ mitã kuimba'e. Umi hóga jereregua ha hogaguakuéra oho joa oguerohory chupe oikuaávo Ñandejára ipy'a porãitei hague hendive. Ha 8 ára haguépe ogueraha hikuái pe mitãme ojeapi'o haguã, ha omoĩse hikuái chupe itúva réra, Zacarías. Isy katu he'i: Ahániri. Héra va´erã Juan. Ha umi oĩva upépe he'i:
Nde rogagua apytépe ndaipóri avave hérava péicha. Aipórõ oporandu hikuái Zacaríaspe mba'éichapa omboherase pe mitã. Zacarías ojerure peteĩ yvyra pehẽngue ohai haguã hese, ha omoĩ: “Héra Juan”. Ha maymáva opyta ijurujái. Upe javete Zacarías oñe'ẽ jevy, ha oñemoĩ omomba'e guasu Tupãme. Umi hóga jereregua opyta ijurujaipa joa, ha opa rupi pe Judá yvyty jerére oñemombe'u pe ojehuva´ekue. 66 Ohendúva guive oñeporandu joa: “Mba'e apoharãnepa ko mitã?”. Ojehecha porã Ñandejára omoĩha hese ipokatu.
Ñandejára Jesucristo Ñe’ẽ.
24 DE DICIEMBRE
KUATIAÑE’Ẽ MOKÕIHA SAMUEL OHAIVA´EKUE 2 Sam 7, 1-5. 8b-12. 14a. 16
Mburuvicha guasu David oikómaramo hóga guasúpe ha Ñandejára ome'ẽ rire chupe py'a guapy opa mburuvicha guasukuéra ijerére oĩva ndive, he'i maranduhára Natánpe: Mba'éicha piko che aiko óga porãme, ha Ñandejára karameguã katu oĩ óga vakapípe?
Natán he'i chupe: Ejapo pe rejaposéva. Ñandejára niko oĩ nendive.
Ñandejára katu upe pyharépe voi oñe'ẽ Natánpe, ha he'i chupe: “Tereho ere che rembiguái Davídpe ko ha'ekáva chupe: ‘Na nde mo'ãi pe remopu'ãtava chéve óga aiko haguã.
Che roguenohẽva´ekue nde ovechakuéra korágui, ovecha rapykuéri reikohágui, reiko haguã che retã Israel ruvichárõ. Romoirũva´ekue mamo rehoha rupi, ahundi opa nde rehe ija'e'ỹvape, ha romoherakuãva´ekue umi karai guasukuéra herakuã guasuháicha ko yvy ári. Upéi ave, ambosako'iva´ekue che retãgua Israel rendaguã ha upépe amohenda chupekuéra oiko haguã henda teépe, ikatu'ỹ haguãme avave omyangekói chupekuéra, térã umi mba'e vai apoha oguereko asy chupekuéra ymave guaréicha, amoĩrõ guare tendotakuéra oisãmbyhy haguã Israel guápe. Che roipe'áta opa nde rehe ija'e'ỹvagui. Ha che ha'e ndéve, che ame'ẽtaha ndéve ne ñemoñarerã. Opa vove nde rekove ko yvy ári ha remano, amoĩta peteĩ ne ñemoñare ne rendaguépe ha amohendáta chupe nde guapyhápe.
Che itúvata ha ha'e che ra'ýta ne rogagua ha nde retãre añangarekóta ha nde guapyha avei oĩ hatãta opa árape guarã.
Tupã Ñandejára ñe’ẽ.
SALMO 88, 2-5. 27. 29
TUPÃ, OPA ÁRA AROPURAHÉITA NE MBORAYHU TUICHAITEHA.
Tupã, opa ára aropurahéita ne mborayhu tuichaiteha.
Opavavépe aikuaaukáta nde reko jeroviaha.
Aikuaaukáta ne mborayhu mba'e opa'ỹvaha,
nde reko jeroviaha naiñambueivaha,
naiñambueiháicha upe yvága.
Nde ere vaekue: “Che ame'ẽva´ekue
che ñe'ẽ che rembiporavópe.
Kóicha ha'e vaekue che rembiguái Davídpe:
‘Ne ñemoñare ndopa mo'ãi araka'eve,
ha'e kuéra mburuvicha guasúta ojoapykuéri nde rire.’”
He'íne chéve ha'e: ‘Nde hína che ru,
Tupã che renohẽva jejopy vaígui,
ha reñangarekóva che rehe.’
Chupe ahayhúne opa ára,
che ñe'ẽ chupe ame'ẽva rehe napyrũi chéne.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA
1, 67-79
Zacarías, pe mitã ru, Espíritu Sántogui henyhẽva oñe'ẽ, ha he'i:
Tojehovasa Ñandejára, Israel Tupã!
Ha'e ou oguenohẽvo jejopy vaígui hetã guápe!
Péina ombou ñandéve peteĩ Ipu'akapáva ñande pysyrõtava ñane angaipágui,
hembiguái David ñemoñare.
Ha'e oñe'ẽ me'ẽva´ekueimaranduhára rupi ñande pe'ataha umi ñande rehe ija'e'ỹva ha ñande rayhu'ỹva pógui, oiporiahuverekotaha
umi ñande ru ypykuépe ha ndahesarái mo'ãiha iñe'ẽ me'ẽ marangatúgui.
Kóva ha'e iñe'ẽ me'ẽ ñande ru Abrahámpe: ohejataha ñandéve jaiko jakyhyje'ỹre, ñande rehe ija'e'ỹva poguype'ỹ,
jaiko haguã chupe hembijokuái ramo marangatu ha teko jojápe, ha ñaime haguã henondépe opa árapeve guarã.
Nde katu, che ra'ymi, opavave ne renóita pe Yvatetegua maranduhára,
rehótagui henonderã rembosako'ívo hape reikuaauka haguã hetã guápe Tupã oheja reiha chupekuéra opa iñangaipa, ha oguenohẽha jejopýgui.
Ñandejára pe yvatetégui iporiahurereko rupi, ára pyahu ogueru ñandéve,
ohesape haguã umi oikóvape pe pytũmby guasuetépe, ha ñande reraha haguã pe py'a guapy rapére.
Ñandejára Jesucristo Ñe’ẽ.
Fuente en Internet: http://jesuitas.org.py/
Enlace externo verificado y ON LINE a Abril 2013
