TIEMPO DE ADVIENTO
COMPAÑÍA DE JESÚS - LOS JESUÍTAS EN PARAGUAY
PRIMERA SEMANA DE ADVIENTO
LUNES
KUATIAÑE’Ẽ ISAÍAS OHAIVA’EKUE 2, 1-5
Isaías Amós ra'y ohecha vaekue, Judá ha Jerusalén guigua.
Ojehúta ára ko'ẽramo guápe:
Yvyty oĩháme Ñandejára Róga,
yvytykuéra ru'ãme opyta hatãta
ha opaite yvytýgui ijyvatevéta.
Opa tetã hese oñembyatýta.
Heta tetã he'íta oúvo:
“Jaha jajupi Ñandejára yvytýpe,
Israelgua Tupã Rógape,
ohechaukáta ñandéve hape,
ha hape rupi jaguatáta.”
Sióngui osẽta Ñandejára rembiporavopy
Jerusaléngui katu iñe'ẽ.
Tupã ombojovakéta tetã nguérape,
joavy oĩva tetãnguéra rupi
ha'e omoĩ porãta,
umi tetã mombyryve oĩvape jepe.
Kyse pukúgui ojejapóta yvy mbovoha,
ha kyse yvukúgui machéte.
Ndaipóri mo'ã véima ñorãirõ,
avavépe noñembo'e mo'ãi
mba'éichapa oñorãirõva’erã
Néike, Jacob rogagua!
Jaguata katu Ñandejára ohesapeha rupi!
Tupã Ñandejára Ñe’ẽ
En el año A, cuando esta lectura se lee en el domingo primero de Adviento, en su lugar puede leerse, la siguiente:
KUATIAÑE’Ẽ ISAÍAS OHAIVA’EKUE 4, 2-6
Upérõ, pe Ñandejára omoheñóitava, iporã ha omimbipáta,
umi Israélpe oikovéva peguarã.
Umi opytáva Siónpe ha hembýva Jerusalénpe,
oñembohérata marangatúva ha ojehaíta héra kuéra
umi oikovéva apytépe.
Ñandejára ojohéi rire, Siongua kuña kuéra ky'akue, ha omopotĩ rire tuguy
Jerusalén pegua, teko joja pytúpe ha yvytu akúpe opa ha'e mba'e ohapýta,
opa yvyty Sión jere kuévo, ha umi ñembyatyha rupi, Ñandejára ojapóta arakue, arai iñypytũva ha tata rendýpe pyharekue ohesapéta.
Hi'ári, Ñandejára reko mimbipa omo'ãta chupe kuéra
kuarahy aku, ama ha ára pochýgui.
Tupã Ñandejára Ñe’ẽ
SALMO 121, 1-2. 4-9
VY’APE JAHA TUPAÓPE
Avy'aite chéve oje'e ramo:
“Jaha tupaópe”.
Jerusalén! ne rokẽmema roñembo'y.
Upépe ojupi Israel ñemoñaregua kuéra,
Ñandejára réra omomba'e guasúvo,
ojeheja haguéicha chupe kuéra
tembiapoukapy ramo.
Upépe oguapy mburuvicha guasu David rogagua,
teko jojápe oporombojovake haguã.
Pende py'aite guive peñembo'e pejévo:
“Py'a guapýpe tojeiko Jerusalénpe,
kyhyje'ỹme toiko umi nde rayhúva.
Py'a guapy toĩ upe táva ryepýpe,
ha mburuvicha guasu rógape.”
Che ryke'y kuérape
ha umi che kuaáva rayhupápe ajeruréta:
“Py'a guapy toĩ nde pype.
Tupã Ñandejára róga rehehápe añembo'éta.”
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 8, 5-11
Jesús oikévo táva Cafarnaúmpe, peteĩ mburuvicha Romagua oñemboja hendápe. Ojerure Jesúspe oipytyvõ haguã chupe he'ívo:
Karai, che rembiguái niko oime ógape. Ijapapaite ha oñeno hasyete.
Jesús he'i chupe: Aháta amonguera chupe.
Pe ñorãirõhára ruvicha katu he'i: Karai, máva piko che, nde reike haguã che rógape? Eréntena okuerataha, ha che rembiguái okueráta. Che niko aĩ mburuvicha poguýpe, ha areko avei che po guypegua. Ha peteĩme ha'érõ oho haguã, upéva oho. Ambuépe ha'érõ ou haguã, upéva ou. Ha ha'érõ che rembiguáipe ojapo haguã ha'éva, ojapo.
Jesús ohendúvo upéva tuicha oguerohory, ha he'i umi hendive oĩvape:
Añetehápe ha'e peẽme, Israelguakuéra apytépe jepe ndajuhúiva peichaite peve ojeroviáva Tupãre. Ha ha'eve peẽme: Heta oĩ oútava kuarahy resẽ guio ha kuarahy reike guio ha oguapýtava mesápe Abraham, Isaac ha Jacob ndive pe karu guasúpe oikótava Tupã oporosãmbyhy vove yvágape.
Ñandejára Jesucristo Ñe’ẽ
MARTES
KUATIAÑE’Ẽ ISAÍAS OHAIVA’EKUE 11, 1-10
Jesé rapógui
osẽta hoky pyahu, upégui heñóita.
Ñandejára espíritu hi'ári opytáta,
arandu ha akã porã espíritu,
ñemoñe'ẽ kuaa ha mbarete espíritu,
mba'e kuaa ha Ñandejára mbyaje
espíritu.
Opa mba'épe iñe'ẽ rendúta Ñandejárape,
oporombojovake ramo,
vaicha rehénte noma'ẽ mo'ãi,
ha pe oje'enteva nohendu mo'ãi.
Ombojovakérõ ikangývape,
teko joja oiporúta, ha imboriahúvape
hekópe omohendáta.
Imbaretesévape,
oinupãta iñe'ẽme
tukumbópe ramo guáicha,
ha pe iñañávape ipytúpe ojukáta.
Teko jojáta iku'a jokuaha, ha teko jeroviaha
humby ñuãha.
Aguara guasu ovecha ra'y ndive oikóta,
jaguarete ha kavara ra'y ojoykére oñenóta,
vaka ra'y ha león okarúta oñondive,
ha mitã'íta herekua.
Vaka ha óso oikóta oñondive
ha ta'ýra kuéra oñenóta ojoykére,
guéicha avei león ho'úta kapi'i.
Mitã kambu oñemboharáita
mbói chumbe kuára ári,
ha mitãmi ikuápe opo'ĩta.
Ndaipóri mo'ãi
ñembyai térã sarambikue
che yvyty marangatúpe,
henyhẽtagui pe tetã
Ñandejárape oikuaávagui,
y omyenyhẽháicha yguasu.
Upe árape Jesé rapo,
mba'e rechaukaha ramo opu'ãta
tetã nguérape guarã.
Tetãnguéra ohekáta upéva,
ha omimbipáta hekoha.
SALMO 71, 1-2. 7-8. 12-13. 17
HETÃME TOJEIKO HENDAPETE
Tupã, eme'ẽ mburuvicha guasúpe teko joja
ha mburuvicha guasu ra'ýpe teko potĩ,
ikatu haguãicha ne retã oisãmbyhy hekopete,
ha imboriahúvape ohecha kuaa.
Hetãme tojeiko hendapete
ha hetã toisãmbyhy jasy oñehundi peve.
Peteĩ yguasúgui ambue peve upe yvy toĩ ipo guýpe,
Éufrates ysyry guive yvy opaha peve.
Ha'e oguenohẽta imboriahúvape
ojerure vove chupe jejopy vaígui,
ha oikotevẽvape ndorekóiva mamo oho haguã.
Oiporiahuverekóne imboriahúvape
ha chupe oguenohẽne jejopy vaígui.
Mburuvicha guasu réra topa'ỹ araka'eve,
taherakuã kuarahy oñehundi peve.
Tetã nguéra tojehovasa ipo rupi, ha umíva tombovy'a chupe.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA 10, 21-24
Upe javete Jesús henyhẽ Espíritu Santo guigua vy'ápe, ha he'i: “Romomba'e guasu che Ru, yvága ha yvy Jára, reñomi haguére ko'ã mba'e umi iñarandu ha imba'e kuaávagui, ha reikuaauka umi iñarandu'ỹvape. Upéicha che Ru, péichante voi reipotava’ekue ojehu.
Che Ru niko omoĩ che po guýpe opa mba'e. Avave ndoikuaái Tupã Ra'ýpe, Túva añónte. Ha avave ndoikuaái Túvape, Tupã Ra'y añónte, ha umi ojekuaaukávape Tupã Ra'y.”
Ha ojerévo hemimbo'ekuéra gotyo, he'i chupekuéra año: “Ovy'aiténe umi ohecháva pe peẽ pehecháva hína. Añetehápe ha'e peẽme, heta maranduhára ha heta mburuvicha guasu ohechaseva’ekue ko peẽ pehecháva, ha ndohechái. Ha'ekuéra ohenduseva’ekue ko peẽ pehendúva, ha nohendúi.”
Ñandejára Jesucristo Ñe’ẽ.
MIÉRCOLES
KUATIAÑE’ẽ ISAÍAS OHAIVA’EKUE 25, 6-10a
Yvyty Siónpe Ñandejára ipu'akapáva
ombosako'i tetãnguérape guarã
karu guasu oĩháme tembi'u he ha vino he'ẽ,
so'o kyra ha vino poravo pyre.
Ko yvytýpe oipe'áta Ñandejára ahoja hũ
ojaho'íva tetãnguéra.
Ñandejára oipe'áta ñemano,
noñemano mo'ãi araka'eve,
opa rupi omokãta tesay
ha oipe'áta yvy árigui ñemotĩ onáva hetã guare.
Ñandejára he'i péicha.
Upe árape oje'éta: “Kóva hína ore Tupã,
hese rojerovia ha ivaívagui ore pe'a.
Javy'a, ñande rory, ha'e ñane renohẽjejopy vaígui.”
Ñandejára ipópe omo'ãta yvyty Sión.
SALMO 22, 1-6
ÑANDEJÁRA CHE REREKUA,MBA'EVE NAIKOTEVẽI.
õ
Ñandejára che rerekua,mba'eve naikotevẽi.
Ñu rovyũ asýpe che mombytu'u,
y satĩ ypýpe che moguahẽ.
Che mombarete jevy,
ha tape hekópe guáre che reraha héra rehehápe.
Ahasa ramo jepe ka'aguy ypytũ rupi,
ndakyhyjéi chéne, nde, che Jára, reimégui che ndive.
Nde yvyra jekoha, nde rehe che mbojerovia.
Karu guasu chéve rejapo umi che rayhu'ỹva rovake.
Che akãre reñohẽ mba'e ryakuã asy,
ha upe hay'uha remyenyhẽ chovi.
Ne mborayhu ha ne mba'e recha kuaa,
rehechauka chéve aikove aja pukukue,
ha nde rópe Tupã, aikóne opa árape.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 15, 29-37
Jesús osẽ upégui ha oho yguasu Galilea rembe'ýpe. Ojupi peteĩ yvytýpe ha upépe oguapy. Ha heta umi oguahẽva hendápe, ogueraháva hendivekuéra umi ikarẽva, ohecha'ỹva, iñe'ẽngúva, ijypíva ha opaichagua hasývape. Umívape omoĩ joa hikuái Jesús renondépe, ha ha'e omonguera chupekuéra. Ha opavave ohecha ramoite mba'éichapa umi iñe'ẽngúva oñe'ẽ jevy, ijypíva okuera, ikarẽva oguata porã, ha ohecha'ỹva ohecha jevy. Ha oñepyrũ omomba'e guasu hikuái Tupã Israel Járape.
Jesús ohenói hemimbo'e kuérape, ha he'i chupekuéra:
Aiporiahurereko niko ko'ãvape. Ojapóma niko mbohapy ára oĩha ko'ápe che ndive, ha ndoguerekói véima mba'eve ho'uva’erã. Namondoséi hógape ñembyahýire, ani ágã tapére ipy'a mano mba'e.
Hemimbo'e kuéra katu he'i chupe: Mba'éicha piko jajuhúta tembi'u ñamongaru haguã opavavépe. Ko'a rupi niko ndaipóri avave oikóva.
Jesús oporandu chupe kuéra: Mbovy mbuja piko pereko?
Ha'e kuéra he'i chupe: 7, ha pira mbovymi.
Upépe Jesús omboguapy yvýpe opavavépe, ha ojapyhy ipópe umi 7 pan ha umi pira, ha oñembo'e Tupãme ohovasa haguã. Upéi oipehe'ã umi pan ha ome'ẽ hemimbo'e kuérape, ha ha'ekuéra ome'ẽ opavavépe. Ha okaru hikuái hyvatã meve. Ha umi hembýva ombyaty 7 ajaka renyhẽ.
Ñandejára Jesucristo Ñe’ẽ.
JUEVES
KUATIAÑE’ẽ ISAÍAS OHAIVA’EKUE 26, 1-6
Upe árape ojepurahéita péicha Judápe:
“Roguereko táva imbaretéva.
Rosẽ haguã jejopy vaígui,
Ñandejára omoĩ tápia jo'a ha óga mbarete.
Peipe'a okẽnguéra oike haguã tetã marangatu,
nopyrũiva iñe'ẽnguére.
Nde remoingo py'a guapýpe
umi ojepytaso kuaávape
ojeroviágui nde rehe.
Opa ára pejerovia
Ñandejára rehe.
Ha'e mo'ãha opa árape guarãva.
Ha'e omongúiva’ekue
umi yvate oikóvape
ha oity yvýre táva yvate.
Opyrũ haguã hese
umi ojeapo'íva,
ha ohasa haguã hi'ári
umi imboriahúva.”
Tupã Ñandejára ñe’ẽ.
SALMO 117, 1. 8-9. 19-21. 25-27a
PEMOMBA'E GUASU ÑANDEJÁRAPE
Pemomba'e guasu Ñandejárape,
ha'e niko ipy'a porã ha imborayhu ndopái araka'eve.
Iporãve niko jajerovia ramo Ñandejára rehe
avave rehe jajerovia rangue.
Iporãve niko jajerovia ramo Ñandejára rehe
poguasukuérare jajerovia rangue.
Peipe'a chéve tupao rokẽ
ha taike tamomba'e guasu Ñandejárape.
Kóva hína Ñandejára rokẽ,
árupi heko jojáva mante oike.
Ñandejára, ndéve romomba'e guasu,
nde che rendúgui ha che renohẽgui jejopy vaígui.
Ore Jára, ore renohẽ kena jejopy vaígui!
Ore Jára, tosẽ porã kena oréve opa mba'e!
Tojehovasa pe Ñandejára rérape oúva.
Ore pohovasa tupao guive.
Tupã hína Ñandejára, ha'e ñande resape.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 7, 21. 24-27
Ndaha'éiko umi chéve he'íva: “Karai, karai”, oikétava yvágape Tupã oporosãmbyhyhápe. Umi ojapóva che Ru yvágape oĩva rembipotánte oikéta.
Upévare, pe ohendúva che ñe'ẽ ha ojapo upe ha'éva, ojogua ku karai iñakã porãvape hogarã omopu'ãvava’ekue ita ári. Upéi ou oky ha okakuaa umi ysyry. Yvytu hatã oipeju ha ojejapipa pe ógare.
Péicharõ jepe ndo'ái, oñemboguapýgui ita ári. Pe che rendúva ha ndojapóiva che ha'éva katu, ojogua ku tekove tavýpe, omopu'ãva’ekue hogarã yvyku'i ári. Upéi ou oky ha okakuaa umi ysyry. Yvytu hatã oipeju ha ojejapipa pe ógare ha upépe ho'a, oñembyaipaite.
Ñandejára Jesucristo Ñe’ẽ.
VIERNES
KUATIAÑE’ẽ ISAÍAS OHAIVA’EKUE 29, 17-24
Péicha he’i Tupã:
Vokói eténte ka'aguýgui oikóta kokue,
kokue katu ojoguáta ka'aguýpe.
Upe árape ijapysapéva ikatúta ohendu
oĩ ramo chupe kuéra omoñe'ẽva kuatia.
Ha hesatũva ikatúta ohecha,
ndoiko mo'ãvéi pyhare ha pytũmbýpe.
Ojeapo'ívape ombovy'a jeýta
Ñandejára, horýta umi imboriahuvéva
Tupã Israelgua imarangatúva renondépe.
Opáta umi oporojopýva
ha ndaipóri mo'ãvéi hova atãva, oporoapo'íva
ha ojaposéva ivaívante voi.
Opáta oporomombe'u japúva,
omoñuhãva mbojovakehárape,
ha umi hekope'ỹ imarangatúvape ombojovakeukáva.
Upévare, Tupã Israel Jára,
oguenohẽva’ekue Abrahámpe
jejopy vaígui, he'i: “Águive Jacob
notĩ mo'ãvéi ha ndahova pytã mo'ãvéi,
omombe'útagui che réra imarangatuha,
ohechávo pe ajapóva ijapytépe kuéra,
he'íta imarangatuha Israel pegua imarangatúva
ha omomba'éta Tupã Israel Járape. Umi iñakã tavýva
iñakã porãta ha oñe'ẽngururúva iñe'ẽ rendúta.”
Tupã Ñandejára ñe’ẽ.
SALMO 26, 1. 4. 13-14
ÑANDEJÁRA UPE CHE REKOVE OHESAPÉVA.
Ñandejára upe che rekove ohesapéva, ha upe che pytyvõva.
Mávagui piko akyhyjéta?
Ñandejára oñangareko che rehe,
Máva piko che mongyhyjéta?
Peteĩ mba'énte Ñandejárape ajerure,
peteĩ mba'énte aipota.
Tupaópe aikose aikove aja pukukue,
hese ajepy'a mongeta haguã,
ha'e che mbopy'a rory haguã,
chupe amomba'e guasu haguã.
Aikuaa Ñandejára imba'e porãtaha che ndive
aikove aja pukukue.
Pejerovia Ñandejára rehe.
Pende py'a guasúke ha ani pene ate'ỹ.
Añetehápe ha'e peẽme, pejerovia Ñandejára rehe.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 9, 27-31
Jesús osẽvo upégui oho haguã, osẽ hapykuéri mokõi ohecha'ỹva, osapukáiva chupe: Ore poriahurerekomína, nde David ra'y!
Ha oike rire Jesús hógape, oguahẽ hendápe umi ohecha'ỹva. Ha Jesús oporandu chupe kuéra: Peroviápa che ikatuha pomonguera?
Ha'e kuéra he'i chupe: Roguerovia, ore Jára.
Upévo Jesús opoko umi hesáre, ha he'i: Toiko upe peẽ perovia haguéicha.
Ha okuera umi hesa ha ohecha porã jevy. Jesús he'i jey-jey chupekuéra:
Aníke avave oikuaa kóva.
Ha'e kuéra katu, osẽmi vovénte upégui, opa rupi omoherakuã upe Jesús ojapo vaekue hese kuéra.
Ñandejára Jesucristo Ñe’ẽ.
SÁBADO
KUATIAÑE’ẽ ISAÍAS OHAIVA’EKUE 30, 19-21. 23-26
Peẽ, Siongua peikóva Jerusalénpe, ndapejahe'o mo'ã véima. Ñandejára pende poriahurerekóta ohendu vove pesapukái chupe pejerurévo pytyvõ, ha pene rendu vovénte oporandúta peẽme mba'épa peipota. 20 Ha Ñandejára ome'ẽ ramo jepe peẽme jehasa asy rehegua pan ha ñembyasy rehegua y, ha'ehína pene mbo'ehára ha nokañy mo'ã véima pende hegui. Pende resa teépe pehecháta chupe. Ha pepia ramo pende akatúa térã pende asu gotyo, pehendúta peteĩ ñe'ẽ pende rapykuéri he'ítava peẽme: “Kóva hína pe tape, tapeho ko'a rupi.”
Ñandejára omboúta ama upe mba'e ra'ỹi pende yvýpe peñotỹva peguarã ha pe pan osẽva pende yvýgui iporã ha héta. Pene rymbakuérape hembypáta ho'uva’erã. Umi guéi ha vúrro omba'apóva pende kokuépe jepe, oguerekóta hembi'urã umi kapi'i iporãve ha hevéva. Oguahẽvo pe jejuka guasu ára ha ho'ávo umi óga yvate imbaretéva, oĩta ysyry guasu osyry hatãva opa yvyty yvate ha umi yvy pu'ã yvatépe. Ñandejára oipohano ha ojokuáta umi hetãgua oikutu vaekuépe. Upérõ jasy ohesapéta kuarahýicha ha kuarahy ohesapéta 7 kuarahýicha.
Tupã Ñandejára ñe’ẽ.
SALMO 146, 1-6
TOÑEMOMBA'E GUASU ÑANDEJÁRA.
Toñemomba'e guasu Ñandejára.
Ajépa iporãite Tupãme japurahéi ramo,
chupe ñamomba'e guasu vaerã vy'a pópe.
Ñandejára omopu'ã jevy Jerusalén
ha ombyatypa Israelgua
mombyry rupi isarambi va’ekue.
Ipy'a rasýva ha'e omonguera
ha umi ho'o ojejoka hague rupi ha'e ojokuapa.
Ha'e he'i mbovýpa mbyja kuéra oĩta
ha héra rupi peteĩ-teĩme oikuaa.
Ñandejára niko tuicha ha imbarete hína,
iñarandukuépe ndaijojahái.
Ñandejára oipytyvõ imboriahúvape,
hembiapo vaívape katu yvýre oipete.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 9, 35¾10, 1. 5a. 6-8
Upéi Jesús ohasa oikóvo peteĩ távagui ambuépe. Ha mamo oĩháme itupao kuéra, upépe ha'e oporombo'e. Omoherakuã avei marandu porã Tupã sãmbyhyha ára rehegua, ha omonguera opaichagua hasývape. Ha ohechávo hetaha umi ijatýva, tuicha oiporiahurereko chupekuéra. Ohecha kuaa, ha'e kuéra ikane'õ ha ikangypaha ku ovecha herekua'ỹvaicha. Ha he'i hemimbo'e kuérape: Ajépa tuicha pe kokue ha heta hi'a, omono'õ vaerãnte mbovy. Upévare, pejerure pe kóga járape tombou umi ou va’erãme omono'õ.
Jesús ohenói umi 12 hemimbo'épe ha ome'ẽ chupekuéra pokatu omosẽ haguã mba'epochy, ha omonguera haguã opaichagua mba'asy.
Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra'ykuéra. Felipe ha Bartolomé, Tomás ha Mateo, viru ombyatýva Roma peguarã. Avei Santiago, Alfeo ra'y ha Tadeo. Oĩ avei Simón, hetã rayhúva, ha Judas Iscariote, pe upéi omoñuhã va’ekue Jesúspe.
Jesús omondo hembiaporãme ko'ã 12 kuimba'épe kóicha ombo'e rire chupe kuéra: Tapeho uvei Israelgua rendápe, ku ovecháicha okañymbáva. Tapeho pemyerakuã hi'aguĩmaha ñesãmbyhy yvágagui oúva. Pemonguera hasýva, pemoingove jevy omanóvape, pemonguera umi hete aipávape ha pemosẽ mba'epochy opavavégui. Peẽme niko oñeme'ẽ rei ko pokatu, ani pejerure hese mba'eve.
Ñandejára Jesucristo Ñe’ẽ.
SEGUNDA SEMANA DE ADVIENTO
LUNES
KUATIAÑE’ẽ ISAÍAS OHAIVA’EKUE 35, 1-10
Tahory yvy ojeiko'ỹha ha yvy iñapekãmbáva,
tovy'a ha ta ipoty yvy perõ!
Tahenyhé yvotýgui,
tahory, tosapukái vy'águi!
Chupe oñeme'ẽ Líbano reko mimbi,
Carmelo ha Sarón reko jegua.
Maymáva ohecháta Ñandejára imimbipápe,
Tupãme ohecháta ijajaipápe.
Pemombarete ikangývape, pemokyre'ỹ ikane'õvape.
Peje ojepy'apývape: “Néike, ani pekyhyje!
Ápe oĩ pene Tupã, ou omyengoviávo pende rehe ija'e'ỹvape
ou pende pe'ávo jejopy vaígui.”
Upérõ umi ohecha'ỹva ohecháta, ha umi ohendu'ỹva ohendúta.
Upérõ ijapáva, guasúicha oñaníta ha iñe'ẽngúva vy'águi osapukáita,
hetátagui pe y yvy ojeiko'ỹháme ha y osyry hatãva yvy perõme.
Yvy ndahi'ýivagui ojapóta y renda ha yvy ijyuhéivape ombohetáta yvu.
Aguara'i rekohágui, oikóta takuaraty ha pirity.
Upépe oĩta peteĩ tape oñembohératava “Tape marangatu”.
Upe rupi ndoguata mo'ãi heko ky'áva ha itavýva ndoiko mo'ãi.
Ndaipóri mo'ãi upépe jaguarete, ha ndoike mo'ãi tymba saite.
Upe rupi oguatáta umi oguenohẽ va’ekue
jejopy vaígui Ñandejára,
ha oikéta Siónpe purahéi ha vy'a pópe.
Vy'a ha tory omoirũta chupe kuéra,
ha mombyry opytáta pyahẽ ha vy'a'ỹ.
Tupã Ñandejára ñe’ẽ.
SALMO 84, 9ab. 10-14
ÑANDEJÁRA, HA'ETE VOI OME'ẼTA ÑANDÉVE IPORÃVA
Ajapysakáta Tupã he'ívare.
Ha'e he'i ome'ẽtaha py'a guapy
Hi'aguĩ ára ha'e oguenohẽ haguã jejopy vaígui
umi chupe omomba'évape.
Tupã, nde reko mimbipa ojekuaáne
ore yvýpe.
Mborayhu ha añete oñuguãitĩne,
py'a guapy ha teko joja oñoañuãne.
Añete heñóine upe yvýgui,
ha teko joja yvágagui oma'ẽne.
Ñandejára, ha'ete voi ome'ẽta ñandéve iporãva,
ha ko ñande yvy ome'ẽta hi'a.
Tekojoja ohóne henonderã,
ombosako'ívo chupe haperã.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA 5, 17-26
Peteĩ árape, Jesús oporombo'e javehína, oguapy ra'ehína upe rupi Fariséova, ha Moisés rembiapoukapy mbo'eháva ouva’ekue Galilea, Judá ha Jerusaléngui. Ha Ñandejára pokatu ojechauka Jesús rupi omonguerávo heta hasývape. Upérõ oguahẽ kuimba'ekuéra ogueraháva hupápe peteĩ ijapávape. Oguerahase hikuái pe kotypýpe omoĩ haguã Jesús renondépe. Ha ndojuhúi hikuái moõ rupípa omoingéta, hetágui umi upépe oĩva. Aipórõ ojupi hikuái pe óga ári, ombokua pe óga ape ha omboguejy hikuái pe hasývape, hupápe, Jesús renondépe. Jesús ohechávo mba'eichaitépa ha'ekuéra ojerovia hese, he'i pe hasývape: Che irũ, ojeheja reíma ndéve ne angaipa.
Ha upévo, umi Moisés rembiapoukapy mbo'eha ha umi fariseo oñepyrũ he'i: “Máva piko kóva péicha ojahéi haguã Tupãre, ku hendaguépe oĩrõ guáicha? Tupã añónte niko ikatu oheja rei ñandéve ñane angaipa.”
Ha Jesús ohecha kuaa mba'épa he'i hína hikuái ipy'apýpe, ha oporandu chupekuéra: Mba'érepa pejepy'a mongeta péicha? Mba'épa ndahasyive ja'e: “Ojeheja reíma ndéve ne angaipa”, térãpa: “Epu'ã ha eguata”? Néi, ahechaukáta peẽme che, yvypóraicha aju vaekue, ikatuha ko yvy ári oipysyrõ angaipa.
Ha upévo he'i pe ijapávape: Ndéve ha'e: ‘Epu'ã, ehupi nde rupa ha tereho nde rógape.’
Upepete pe ijapáva opu'ã opavave renondépe, ohupi hupa oñeno hague, ha oguerohory Tupãme ohóvo hógape. Maymáva opyta ijurujái, ha oguerohory hikuái Tupãme. Ha tuicha kyhyje reheve he'i joa: Ko árape jahecha mba'e hechapyrãva.
Ñandejára Jesucristo Ñe’ẽ.
MARTES
KUATIAÑE’ẽ ISAÍAS OHAIVA’EKUE 40, 1-11
Tupã he'i: “Pembovy'a, pembovy'a che retã guápe.
Peñe'ẽ pende py'aite guive Jerusalénpe ha peje chupe opamaha
itembiguái reko, omyengoviapamaha hembiapo vaikuére,
ohupytýma hague Ñandejáragui ñenupã jo'a opa iñangaipáre.”
Oĩ peteĩ osapukáiva: “Pembosako'i Ñandejárape haperã yvy ojeiko'ỹháme,
pejapo yvy perõme tape po'i ñane Tupãme guarã.
Pemyenyhẽ umi ipyko'ỹha, pemboguejy yvyty ha yvy pu'ã.
Pejapo yvyty pa'ũgui ñu ojoja paitéva.
Upérõ Ñandejára ohechaukáta heko mimbipa ha upéva ohecháta opa yvypóra oñondive.
Ñandejára voi upéicha he'i.”
Oĩ he'íva: “Ere hatã”, ha che ha'e: “Mba'e piko ha'e vaerã?”
“Opa yvypóra kapi'ícha, ha yvoty ñúicha hekove.
Pe kapi'i ipiru, haviru pe yvoty Ñandejára oipeju ramo hi'ári.
Yvypóra niko añete ku kapi'ícha.
Pe kapi'i ipiru, haviru pe yvoty, Tupã ñe'ẽ katu opyta opa árape guarã.”
Ejupi yvyty yvatépe, nde, reraháva Siónpe marandu porã.
Hatã esapukái, nde, reraháva marandu porã Jerusalénpe.
Esapukái kyhyje'ỹre, ere Judá pegua táva kuérape:
“Péina upépe ne Tupã!”
Oguahẽma Ñandejára ipokatu reheve ha pyapy mbaretépe opa mba'e ipo guýpe omoĩ.
Ogueru hendive hetãgua oguenohẽ va’ekue jejopy vaígui.
Ovecha rerekuáichaogueraha ijovecha kuéra omongarúvo, ohupi umi ovecha ra'y, ogueraha ijyva ári ha oñangareko ovecha imemby ramóvare.
Tupã Ñandejára ñe’ẽ.
SALMO 95, 1-3. 10ac. 11-13
PEROPURAHÉI ÑANDEJÁRAPE PURAHÉI PYAHU.
Peropurahéi Ñandejárape purahéi pyahu.
Topurahéi Ñandejárape
opa ko yvy.
Pepurahéi Ñandejárape,
héra pemomba'e.
Opa árape pemoherakuã
ha'e oporoguenohẽha jejopy vaígui.
Toje'e opa tetã rupi:
“Ñandejára ñande ruvicha guasuhína”.
Ha'e oisãmbyhy teko jojápe tetãnguéra.
Tovy'a yvága ha yvy.
Tosununu pe yguasu ha opa ipype oĩva.
Tovy'a umi ñu ha opa mba'e ipype oĩva.
Vy'águi tosapukái umi yvyra ka'aguy pegua.
Tojepurahéi Ñandejára renondépe,
ha'e ou ko yvy oisãmbyhy haguã.
Teko jojápe ko yvy oisãmbyhýta, ha añetépe tetãnguéra.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 18, 12-14
Mba'épa peẽ peimo'ã ojapotaha peteĩ kuimba'e oguerekóva 100 ovecha, ha okañy ramo chugui peteĩ? Ohejáne ñúme umi 99, oho haguã oheka pe okañy va’ekue. Ha ojuhúvo, ovy'aiteveva’erã ko peteĩ ovecha reheve, umi 99 okañy'ỹva’ekue reheve guágui. Péicha avei, pende Túva oĩva yvágape ndoipotái oñehundi peteĩnte jepe ko'ãvagui, mitãicha che rehe ojeroviáva.
Ñandejára Jesucristo Ñe’ẽ.
MIÉRCOLES
KUATIAÑE’ẽ ISAÍAS OHAIVA’EKUE 40, 25-31
Tupã Imarangatúva oporandu:
Mávare piko che mbojojáta,
añembojoja haguã hese?
Pejesaupi ha pema'ẽ.
Máva piko umi mba'e apohare?
Pe he'íva peteĩ-teĩme
hembiaporã ha héra rupi ohenói.
Ha'e ipokatu ha ipu'aka mbarete rupi
ndaipóri ou'ỹva ijapytépekuéra.
Mba'ére piko ere, Jacob,
ha ere jey nde Israel:
“Ñandejára nda che recha kuaái.
Tupã mba'eve ndoikuaaséi che hegui?”
Ndereikuaái nga'u piko?
Araka'eve piko nerehendúi
Tupãha, opa ára Ñandejára?
Ha'e ojapo ko yvy tuichakue,
ndaijuku'ái, naikane'õi, iñarandu ndaijapýrai.
Ha'e omokyre'ỹ ikane'õvape,
ikangývape omombarete.
Mitã rusu jepe ijuku'a ha ikane'õne,
karia'y oñepysãnga ha ho'áne,
ojeroviáva Ñandejárare
katu ikyre'ỹ jevýne ha taguatóicha ovevéne.
Ijuku'a'ỹre oñaníne ha oguatáne ikane'õ'ỹre.
Tupã Ñandejára ñe’ẽ.
SALMO 102, 1-4. 8. 10
AMOMBA'E GUASU ÑANDEJÁRAPE CHE PY'AITE GUIVE,
Amomba'e guasu Ñandejárape che py'aite guive,
che py'aite guive amomba'e guasu héra marangatu.
Amomba'e guasu Ñandejárape
che py'aite guive,
nda che resarái chéne
heta mba'e porã ome'ẽ hague chéve.
Ha'e oheja rei chéve che rembiapo vaikue
ha che mongueráva opaichagua mba'asýgui.
Ha'e ndohejái apa yvy kuápe
ha mborayhúpe che añuã ha che mokunu'ũ.
Ñandejára imba'e porã
ha oporoporiahuvereko,
ndaipochy reíri ha oporohayhu.
Nomyengoviái ñandéve ñane angaipa,
ha ndojapói ñande rehe ojapo haguãicha.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 11, 28-30
Peju che rendápe opa peẽ pene kane'õ ha pemba'apo pohýiva, ha che pomombytu'úta. Peheja tamoĩ pende apére che mba'e pohýi, ha pejapo che ha'éva peẽme. Ha peikuaáta che py'a porãha ha ndajejapoiha, ha che ndive pejuhúta pytu'u. Pe mba'e pohýi amoĩ tava pende apére niko ivevýita peẽme, ha ndaipohýi mo'ãi upe aipotáva peraha.
Ñandejára Jesucristo Ñe’ẽ.
JUEVES
KUATIAÑE’ẽ ISAÍAS OHAIVA’EKUE 41, 13-20
Che, Tupã nde Jára, roguerekógui che po akatúpe
ha ha'e ndéve: “Ani rekyhyje, aju roipytyvõvo.”
Israel, Jacob retã, ne michĩ ha ne kangy ramo jepe,
ani rekyhyje, che roipytyvõ.
Che, Tupã Israelgua Imarangatúva, upe roipe'áva ivaívagui.
Ajapóta nde hegui mba'e ra'ỹi jykyiha,
hãimbe jovái, ipyahu ha oñehãimbe'e porãva.
Rejykýi ha remyangu'íta yvyty kuéra
ha yvy pu'ã nguéra rehejáta kapi'i piru kuéicha.
Repoíta yvytúre ha yvytu oguerovevéta, yvytu ratã omosarambíta.
Upérõ revy'áta ipy'a porãgui Ñandejára,
Tupã Israelgua Imarangatúva ha'éta nde jeroviaha.
Imboriahu ha mba'eve oguereko'ỹva
oiko y rekávo ha ndojuhúi.
Ikũ avevopa ijyuhéigui.
Che, opa mba'e Jára katu, hese añangarekóta,
Che, Tupã Israel Jára, ndaheja mo'ãi chupe kuéra.
Y ambosyrýta umi yvyty perõme ha yvueta umi ñu rupi amoĩta.
Yvy ojeiko'ỹhágui ajapóta y renda
ha yvy apekãgui anohẽta ysyry.
Yvy ojeiko'ỹháme amoĩta kuri'y, jukeri ha olivoty,
ha yvy perõme amoheñóita kuri'y opaichagua,
ikatu haguã opavave ohecha ha oikuaa,
hese oñamindu'u ha ipahápe ohecha kuaa,
Che, opa mba'e Jára, upe Israelgua Imarangatúva,
ajapo hague ko'ã mba'e che pokatúpe.
Tupã Ñandejára ñe’ẽ.
SALMO 144, 1. 9-13ab
TUPÃ CHE JÁRA, NDÉVE ROMOMBA'E GUASÚTA
Tupã che Jára, ndéve romomba'e guasúta
che ruvicha guasu.
Nde réra amomba'éta opa árape.
opavavépe ha'e ohecha kuaa,
ha ohecha ramó opa hembiapokue.
Opa ne rembiapokue ta ne momba'e guasu, Ñandejára,
opa nde rehe ojeroviáva ta ne momba'e guasu.
Ha'e kuéra tomyerakuã tuichaha upe ne retã,
ha'e kuéra toikuaauka nde ne mbareteha.
Upéicha ramo maymáva
oikuaáne ne mbareteha,
ha upe ne retã tuichaha.
Ne retã niko mba'e opa'ỹva,
ha nde reporosãmbyhýta opa árape.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 11, 11-15
Añetehápe ha'e peẽme, ndaipóri yvypórakuéra apytépe mba'e guasuvéva Juan Bautístagui. Opáichavo, pe michĩvéva Tupã oisãmbyhyhápe, upéva mba'e guasuve chugui.
Juan Bautista ouha ára guive ko'ágã peve, heta ivaíva ojejapo ñesãmbyhy Tupãgui oúvare, ha heta oĩ mbaretépe upéva omoingoséva. Juan ou mboyve niko maranduhárakuéra ha Moisés rembiapoukapy imandu'a ñesãmbyhy Tupãgui oúvare, ha peẽ peroviase ramo umíva ñe'ẽ, Juanhína maranduhára Elías, pe oje'eva’ekue outaha. Ohendúvake tojapysaka porã.
Ñandejára Jesucristo Ñe’ẽ.
VIERNES
KUATIAÑE’ẽ ISAÍAS OHAIVA’EKUE 48, 17-19
Péicha he'i Tupã Israel Jára marangatúva, ivaívagui nde pe'áva.
Che, Tupã nde Jára, rombo'e ndéve ou porãtava rehe ha ahechauka ndéve nde raperã.
Rehendu che ñe'ẽ, nde vy'a okakuaava’erã mo'ã ysyry guasúicha, ha ypu'ã yguasúpe guáicha reñakã rapu'ãva’erã mo'ã!
Yvy ku'ícha heta vaerã mo'ã ne ñemoñare,
umi nde hegui osẽva yvyku'i ra'ỹi yguasu rembe'ýpe guáichava’erã mo'ã.
Ndojehapo'ói vaerã mo'ã nde réra, ha ndojeíri vaerã mo'ã che renondégui.
Tupã Ñandejára ñe’ẽ.
SALMO 1, 1-4. 6
TUPÃ OÑANGAREKO IMARANGATÚVA RAPÉRE.
Ovy'a umi ojapo'ỹva iñañáva ñe'ẽ, oiko'ỹva iñangaipáva ndive,
ojehe'a'ỹva umi Tupãre oñembohorýva ndive.
Tupã rembiapoukapy ipy'a ombohory,
ha hese ojepy'a mongeta ára ha pyhare.
Ojogua ku yvyra mátape oñeñotỹva y rembe'ýpe,
hi'áva hi'árape, ha ndahoguekúiva.
Opa mba'e ojapóva osẽ porã chupe.
Ndaupéichai umi hembiapo vaíva,
kapi'i piru kuéicha umívape yvytu omboveve.
Tupã oñangareko imarangatúva rapére,
hembiapo vaíva rape katu opa vai.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 11, 16-19
Ñandejára he’í:
Mávarepa ikatu ambojoja umi ko'agãgua? Ojogua umi mitã pe okáre oñembojarúva ha osapukáiva ojupe: he'ívo: “Rombopu niko peẽme mimby ha ndapejerokýi, ropurahéi peẽme purahéi jahe'o ha napenerasẽi.”
Ou niko Juan, ndokarúiva ha ndo'úiva kaguy, ha peje hese oguerekoha mba'epochy. Upéi katu aju che, yvypóraicha ajuva’ekue, akaru ha ha'úva vino, ha peje che rehe, che karu ha che ka'uha, aikoha umi heko añáva ndive ha umi viru omono'õva Roma peguarã ndive. Tupã arandu niko ojehecha ñane rembiapokue rupi.
Ñandejára Jesucristo Ñe’ẽ.
SÁBADO
KUATIAÑE’ẽ ECLESIÁSTICOPE OĨHÁICHA 48, 1-4. 9-11
Upéi opu'ã maranduhára Elías tatáicha,
iñe'ẽ ohapy tata rendýicha.
Ha'e ogueru hi'ári kuéra ñembyahýi,
ha ipochýgui omombovy chupekuéra.
Iñe'ẽ rupi Ñandejára nomongyvéi,
ha mbohapy jevy omboguejy tata yvágagui.
Ajépa nde tuichaiteva’ekue, Elías, ne rembiapópe!
Mávapa ikatúta he'i ne mbojoja hague?
Yvytu ratã tata guiguáva nde reraha yvate kárro tatápe.
Nde rehe ojehaiva’ekue reimeha reju jey haguãicha
rembovevyivévo Ñandejára pochykue,
oguahẽ mboyve hi'ára, remoingo porã haguã
túva ha ta'ýra oñondive remyatyrõ jevy haguã Israel retã.
Ovy'aite vaerãpa umi nde recháva omano mboyve
ha ko'yteve nde, reikovéva!
Tupã Ñandejára ñe’ẽ.
SALMO 79, 2ac. 3b. 15-16. 18-19
TUPÃ NDE PU'AKAPÁVA, EJU JEVY ORE RENDÁPE.
Israel rerekua ore rendu kena.
Nde reguapýva umi tekove ipepóva ári,
ehechauka nde pokatu.
ehechauka oréve ne mbareteha
Tupã nde pu'akapáva,
eju jevy ore rendápe.
Amo yvága guive emaña ore rehe.
Eju ehecha parralty,
nde poite rupi reñotỹva’ekue
ha nde voi remongakuaava’ekue.
Nde po toĩ nde akatúa pegua ári,
upe ne rembiporavo
remombareteva’ekue.
Upéicha ramo ndorojeréi chéne nde hegui.
Eheja toroikove ha toromomba'e nde réra.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 17, 10-13
Hemimbo'e kuéra oporandu Jesúspe: Mba'ére piko umi Moisés rembiapoukapy mbo'eha he'i Elías ou raẽva’erãha?
Jesús he'i chupekuéra: Añete niko Elías raẽ ouva’erãha, ha ha'e omoĩmba porãva’erã opaite mba'e hekópe. Ha che ha'e peẽme, Elías oúma hague ha avave ndoikuaái hague chupe. Upévare ojapo hikuái hese opa ojaposéva. Péicha avei che, yvypóraicha ajuva’ekue, ahasa asýta ipópekuéra.
Upépe ae, hemimbo'ekuéra ohecha kuaa Jesús oñe'ẽ hague chupekuéra Juan Bautista rehe.
Ñandejára Jesucristo Ñe’ẽ.
TERCERA SEMANA DE ADVIENTO
LUNES
Kuatiañe’ẽ Númerospe oĩháicha 24, 2-7. 17a
Ha ohecha Israel guápe oĩvahína hekohápe aty-atýpe, ñemoñare ojuehe guáva. Tupã espíritu oike ipy'a pýpe, ha Balaam oipyaha momarandu:
Che Balaam, ku Beor ra'y, mombyry hína ahecha.
Ahendu umi mba'e Tupã he'íva, aikuaa ha'e oikuaáva avei.
Tupã ipu'akapáva heta mba'e ohechauka chéve che páype,
che képe ramo guáicha.
Iporã Israel umi nde róga ha pende rekoha.
Ojogua umi ñu yvyty pa'ũ rupi ohasáva,
ha umi yvotyty, ysyry rembe'ýre ipotýva,
Ojogua karaguataty oñotỹva Ñandejára
ha umi kuri'y, y rembe'ýpe opu'ãva!
Israélpe upe y hembypáta,
omohe'õ haguã hemitỹnguéra,
ha huvicha guasu aipo Agággui imbaretevéta.
Ama'ẽhína Israel ko'ẽramo guáre,
ahecha upégui osẽ, omimbíva kuarahýicha,
Tupã Ñandejára ñe’ẽ.
SALMO 24, 4-5a. 6-7bc. 8-9
TUPÃ, EHECHAUKA CHÉVE UMI NDE RAPE.
Tupã, ehechauka chéve umi nde rape,
ha umíva rupi che sãmbyhy.
Che mbo'e umi mba'e añete guáva.
Ñandejára, ani nde resarái ne mborayhu
ha nde poriahurerekógui,
reñandúva ore rehe opa árape.
ha mba'e vai ajapo vaekuégui
che mitã ramo guare.
Che Jára,
ani nde resarái che hegui, ne mborayhu niko tuicha.
Ñandejára niko imba'e porã ha imarangatu,
upévare oheko mbo'e heko vaívape.
Imboriahúvape oisãmbyhy ani haguãtei ojavy,
ha hapére chupekuéra omboguata.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 21, 23-27
Jesús oho jey Tupaópe, ha oporombo'e jave upépe hína, oguahẽ hendápe pa'i ruvichakuéra ha Israel myakãhárakuéra. Oporandu chupe hikuái:
Máva piko oheja ndéve rejapo haguã ko'ã mba'e? Máva pokatu rupi reju?
Jesús ombohovái chupekuéra: Che aporandúta avei peẽme peteĩ mba'e, ha pejéramo chéve, ha'éta peẽme mba'éicha rupípa ajapo ko'ã mba'e. Peje chéve: Máva piko ombou raka'e Juánpe oporomongarai haguã? Tupã térã piko yvypóra?
Ha'e kuéra katu oñepyrũ oñomongeta kyre'ỹ oñondive, ha he'i: “Ja'éramo Tupã ombou hague chupe, he'íta ñandéve: ‘Mba'ére ndaperoviái ra'e chupe?’ Ha ja'éramo yvypóra hague, opu'ãta ñande rehe opavave. Ha'ekuéra niko ogueroviahína Juan, maranduhára hague.”
Upévare he'i hikuái Jesúspe: Ndoroikuaái.
Upépe Jesús he'i chupe kuéra: Upéicharõ, che avei namombe'u mo'ãi peẽme máva pokatu rupípa ajapo ko'ã mba'e.
Ñandejára Jesucristo Ñe’ẽ.
MARTES
KUATIAÑE’ẽ SOFONÍAS OHAIVA’EKUE 3, 9-13
Upéva oguahẽvo tetãnguéra juru amopotĩta
chéve oñembo'e haguã opavave,
ojapo haguã che aipotáva.
Etiopía ysyry guasu mboypýrigui
che retãgua isarambipáva
oúta oñembo'évo,
imba'e kuave'ẽ oguerúta chéve.
Upérõ nde, che retãgua
ne retĩ mo'ã véima,
ne rembiapo vaikuére,
repu'ã haguére che rehe.
Upérõ aipe'áta nde apytégui
umi ijejapóva,
ha nderejejapo mo'ãvéi
che yvyty marangatúpe.
Ahejáta nde pype
umi imirĩva ojejapo'ỹvape.
Che rehénte ojeroviáta ha'e kuéra.
Umi Israelgua hembýva
ndojapo mo'ãi heko joja'ỹva, ndaijapu mo'ãi.
Nomyenyhẽ mo'ãi ijuru ñe'ẽ reígui,
Ikatúta okaru ha opytu'u kyhyje'ỹre.”
Tupã Ñandejára ñe’ẽ.
SALMO 33, 2-3. 6-7. 17-19. 23
ÑANDEJÁRA OHENDU UMI IJOHÉI PYRÉVA ÑEMBO'E
Amomba'e guasúta opa ára Ñandejárape,
chupe aropurahéita tapiaite.
Ñandejára ombovy'a che rekove.
Imboriahúva tohendu ha tovy'a!
Umi Ñandejára rehe ojeroviáva vy'águi ojajaipáne,
ha hova noñomi chéne ñemotĩgui.
Che, tekove poriahu, Ñandejárape añembo'e.
Ha'e, che rendu ha che pe'a jejopy vaígui.
Heko vaívagui katu ndoikuaaséi mba'eve,
umíva opava’erã tesaráipe.
Ñandejára ohendu umi ijohéi pyréva ñembo'e
ha oguenohẽ chupekuéra upe ojejopy vai hágui.
Ñandejára oñemboja umi ohasa asývare
ha oguenohẽ umi ikangypávape jejopy vaígui.
Ñandejára oguenohẽ jejopy vaígui hembiguáikuérape,
ha mba'eve ivaíva ndojejapói chéne umi hendápe oguahẽvare.
EVANGELIO
ÑANDEJÁRA JESUCRISTO REKOVE HA HEMIMBO’E SAN MATEO OMOMBE’U HÁICHA 21, 28 -32
Jesús oporandu opavavépe:
Mba'épa peje ko peẽme amombe'útavare. Oĩva’ekue peteĩ kuimba'e ita'ýra mokõiva. Ha he'i pe ijypykuépe: “Che ra'y, tereho emba'apo ñande parraltýpe.” Pe ita'ýra katu he'i chupe: “Ndahaséi”. Upéi ombyasy péicha he'i hague, ha oho. Upéi pe kuimba'e oho ita'ýra pahague rendápe, ha he'i avei chupe oho haguã omba'apo. He'i katu ha'e itúvape: “Néi, che ru, aháta”, ha ndohói. Mávapa umi mokõivévagui ojapo itúva rembipota?
Umi upépe oĩva he'i chupe: Pe ijypykue.
Upépe Jesús he'i chupekuéra: Añetehápe ha'e peẽme, umi viru ombyatýva Rómape guarã ha umi kuña reko vai raẽ oikéta pende hegui Tupã sãmbyhy yvágape. Juan Bautista niko ouva’ekue pene mbo'évo mba'éichapa peikova’erã, ha ndaperoviaséiva’ekue chupe. Umi viru ombyatýva Rómape guarã ha umi kuña reko vai katu oguerovia chupe. Peẽ pehecháramo jepe upéva, napembyasýi pende reko vai ha ndapejeréi chugui, perovia haguã chupe.
Ñandejára Jesucristo Ñe’ẽ.
MIÉRCOLES
KUATIAÑE’Ẽ ISAÍAS OHAIVA’EKUE 45, 6b-8. 18. 21b-25
Che opa mba'e Jára, ndaipóri ambue.
Che upe ajapóva tesakã ha pytũ,
ame'ẽ jeiko porã ha jejopy vai.
Che, opa mba'e Jára, ajapo opa ko'ã mba'e.
Yvágagui ho'aháicha ysapy ha araígui ama,
amboúta yvy ári akã rapu'ã.
Yvýgui amoheñóita ivaívagui ñesẽ
ha ijykére amoĩta tekojoja.”
Che, opa mba'e Jára, umíva ajapóta.
Péicha he'i Ñandejára ojapova’ekue yvága,
ha'ehína Tupã.
Ha'e ojapo yvy ha omoĩ hatã hendaguãme,
ndojapói yvy perõ, ojapo uvei,
pype ojeiko haguãicha:
“Chehína opa mba'e Jára, ndaipóri ambue.
Mávapa omombe'u ra'e ko'ã mba'e oiko mboyve,
iñepyrũha guive?
Mávapa ymaite guive he'i ra'e oikotaha?
Ndaha'éipa ra'e?
Che hína opa mba'e Jára ndaipóri ambue Tupã.
Che hína Tupã hekojojáva ha oporope'áva ivaívagui,
ndaipóri ambue.
Peju jevy che rendápe poipe'a haguã ivaívagui,
peẽ opa rupigua.
Chehína Tupã ha ndaipóri ambue.
Che añe'ẽ me'ẽ che rérape voi.
Che jurúgui osẽ ñe'ẽ añetegua
ha ndopyta rei mo'ãi.
Che renondépe oñesẽta opavave
ha che rérape ome'ẽta iñe'ẽ, he'ívo:
‘Ñandejára ndive ñoite oĩ akã rapu'ã ha pokatu’.
Henondépe opytáta itĩndy opa umi hese
ipochy rendyva’ekue.
Ñandejára rehe ae oñakã rapu'ã
ha omimbipáta Israel ñemoñare.
Tupã Ñandejára ñe’ẽ
SALMO 84, 9ab. 10-14
HA'E HE'I OME'ẼTAHA PY'A GUAPY
Ajapysakáta Tupã he'ívare.
Ha'e he'i ome'ẽtaha py'a guapy
Hi'aguĩ ára ha'e oguenohẽ haguã jejopy vaígui
umi chupe omomba'évape.
Tupã, nde reko mimbipa ojekuaáne
ore yvýpe.
Mborayhu ha añete oñuguãitĩne,
py'a guapy ha teko joja oñoañuãne.
Añete heñóine upe yvýgui,
ha teko joja yvágagui oma'ẽne.
Ñandejára, ha'ete voi ome'ẽta ñandéve iporãva,
ha ko ñande yvy ome'ẽta hi'a.
Tekojoja ohóne henonderã,
ombosako'ívo chupe haperã.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA 7, 19-23
Ha omondo Ñandejára rendápe, oporandúvo chupe ha'épa añete pe ouva’erã, térã oha'arõva’erãpa hikuái ambuépe. Aipórõ, Juan Bautista remimboukuéra oñemboja Jesús rendápe, ha he'i chupe: Juan Bautista ore mbou roporandu haguã ndépa ha'e pe ou vaerã, térãpa roha'arõva’erã ambuépe.
Upe javete Jesús omonguera oikóvo hetápe imba'asýgui ha iñangatakuéragui, ha mba'epochýgui ave, ha omonguera ohecha heta ohechave'ỹ vaekuépe.
Upéi he'i chupe kuéra: Tapeho ha peje Juánpe opa mba'e pehecháva ha pehendúva. Pemombe'u chupe ohecha'ỹva ohecha jeyha, ijypíva oguata porãha, ipire aipáva okueraha, ohendu'ỹva ohendu jevyha, omanóva oikove jevyha ha imboriahúvape oñehendukaha marandu porã. Ha ovy'aiténe umi ojerovia mantéva che rehe!
Ñandejára Jesucristo Ñe’ẽ.
JUEVES
KUATIAÑE’Ẽ ISAÍAS OHAIVA’EKUE 54, 1-10
Esapukái vy'águi kuña ikatu'ỹva ne memby
ha ne memby'ỹva’ekue, epurahéi rory nde
na ne membýi vaekue araka'eve,
he'ígui Ñandejára: “Kuña ojeheja reiva’ekue
imemby hetavéta kuña omendava’ekuégui.”
Embotuichave nde róga vakapi, eipyso kyhyje'ỹre
pe reñemo'ãha, embopukuve isã,
eikutu porã umi yvyra hakua, rejepysótagui
nde akatúa ha nde asu gotyo.
Ne ñemoñare heta tetãre oñemomba'éta
ha oikóta umi táva ko'ágã ojeiko'ỹháme.
Ani rekyhyje, nereñemotĩ mo'ãi,
ndaipóri mo'ãi mba'érepa reiko haguã tĩndyhápe.
Ne kuñataĩme guare akã hatãnguégui
reñembyesaráita, na ne mandu'a mo'ãvéi
reiko hague mena'ỹre ijaheipýrõ,
omendátagui nde rehende Apohare, hérava
opa mba'e Jára ipu'akapáva,
ivaívagui nde pe'áva, Tupã Israelgua
marangatúva, ko yvy tuichakue Jára.
Ndeva’ekue peteĩ tembireko pyahúicha,
rejeheja rei ha revy'a'ỹva.
Ñandejára katu ne renói jevy ha he'i ndéve:
“Sapy'a mínte roheja kuri ha che py'aite guive
roguereko jevýta che mba'éramo.
Che pochy rendýpe nde hegui akañyva’ekue sapy'aite,
ha upéicharamo jepe, ymaite guive rohayhu che py'aite guive.”
Péicha he'i nde Jára ivaívagui nde pe'áva.
“Añe'ẽ me'ẽ haguéicha Noépe, y ojaho'ipáramo guare yvy,
nambojaho'i mo'ã veimaha ýpe yvy,
upéicha añe'ẽ me'ẽko'ágã ne ndive
nda che pochy mo'ã véima ha ndajahéi mo'ã veimaha nde rehe.
Hendágui ojeíramo jepe, ha ovava yvytykuéra,
ndojei chéne nde hegui che mborayhu,
ha che ñe'ẽ me'ẽ py'a guapy rehegua ndovavái chéne.”
He'i nde Jára nde rayhúva.
Tupã Ñandejára ñe’ẽ.
SALMO 29, 2. 4-6. 11-12a. 13b
ÑANDEJÁRA, CHE, ROMOMBA'E GUASU CHE PE'ÁGUI JEJOPY VAÍGUI,
Ñandejára, che, romomba'e guasu
che pe'águi jejopy vaígui,
ha nderehejáigui umi che rayhu'ỹva
oñembohory che rehe.
Ñandejára, amanomahágui che moingove jevy,
che renohẽ omanóva oho hágui.
Peẽ, Ñandejára rehe pejeroviáva, pepurahéi chupe.
Peropurahéi héra marangatu.
Tupã niko ndaipochy aréi, imba'e porã katu opa árape.
Pyharekue ñane rasẽramo, vy'a ñaroko'ẽ.
Ñandejára, che rendúke ha che poriahuvereko.
Che pytyvõke Ñandejára.
Ñandejára, che rasẽ niko remyengovia vy'ápe,
Tupã che Jára, ndéve apurahéi.
EVANGELIO
ÑANDEJÁRA JESUCRISTO REKOVE HA HEMIMBO’E SAN LUCAS OMOMBE’U HÁICHA 7, 24-30
Juan remimondokuéra oho rire, Jesús oñepyrũ oñe'ẽ hese opavavépe, ha he'i: Peẽ pesẽramo guare peho yvy ojeiko'ỹháme, mba'e pehecha haguãpa peho ra'e? Pehechápa ra'e takuapi yvytu ombovaváva? Nahániri? Maerã aipóramo peho? Pehópa pehecha peteĩ kuimba'e oñemonde jeguapávapa? Peẽ niko peikuaa porã umi oñemonde jeguáva ha vy'ahápe oikóva, oikoha mburuvicha guasukuéra rógapente. Amo ipahápe, mba'e aipóramo pesẽ pehecha? Peteĩ maranduhára, ajépa. Upéicha añete. Ha pejuhu peteĩ mba'e guasuvéva maranduháragui katu. Juan niko hína pe Ñandejára Ñe'ẽme he'iha: Che amondo che ñe'ẽ rerahaha ne renonderã
ombosako'i haguã ndéve nde raperã.
Ha'e peẽme, ndaipóri yvypórakuéra apytépe mba'e guasuvéva Juángui. Opáichavo, pe michĩvéva Tupã oisãmbyhyhápe, upéva mba'e guasuve chugui.
Opa ohenduva’ekue Juánpe, umi viru mono'õha Rómape guarã jepe, oheja Juan omongarai chupekuéra, ojapo haguã péicha pe teko jojápe porã ojeruréva Tupã. Umi fariseo ha umi Moisés rembiapoukapy mbo'eha katu ndohejái omongarai chupekuéra Juan, ojahéivo pe Tupã ojaposeva’ekuére hesehapekuéra.
Ñandejára Jesucristo Ñe’ẽ.
VIERNES
KUATIAÑE’Ẽ ISAÍAS OHAIVA’EKUE 56, 1-3a. 6-8
Ñandejára he'i: “Pejapo heko joja ha hekópe guáva
Oguahẽ mbotáma ára ivaívagui oñesẽ haguã
ha tekojoja che mba'éva oĩma ojechauka haguãicha.
Ovy'a iteva’rãpa upe ojapóva upéicha
ha oñemohatã hembiapópe ojejokóvo
pytu'uha ára momarãgui ha mba'e vai apógui!”
Mombyrygua ojapóva Ñandejára rembipota,
ha umi mombyrygua oikóva che rape rupi
ojapo haguã che rembipota, che rayhu, ha oiko haguã
che rembiguáiramo, ombyaje ha nomomarãirõ
pytu'uha ára ha oñemohatã che ñe'ẽme'ẽe,
arúta chupekuéra che yvyty marangatúpe
ha ambovy'áta che ñembo'e rógape.
Arohorýta che altárpe imymbahapyha imymbajuka,
che rógare oje'étagui opa tetãme guarã, ñembo'e róga.”
Péicha he'i Ñandejára, ombyatýva Israelgua isarambi vaekuépe:
Umi oñembyaty vaekuépe ambojo'avéta.
Tupã Ñandejára ñe’ẽ.
SALMO 66, 2-3. 4b-5. 7-8
Tupã ta ñande poriahurereko,
ha ta ñande rovasa, toma'ẽñande rehe.
Tojekuaa opa rupi hembipota,
ha opa tetã rupi ha'e oporope'aha jejopy vaígui.
ta ne momba'e guasu maymáva.
Topurahéi vy'a pópe tetãnguéra,
resaimbyhýgui opavave teko jojápe,
hekopete remboguata tetã nguéra yvy ári.
Yvy ome'ẽ hi'a.
Tupã, ñande Ru, ñande rovasa.
Tupã ta ñande rovasa,
ha toñemomba'e chupe ko yvy jerekuévo.
EVANGELIO
ÑANDEJÁRA JESUCRISTO REKOVE HA HEMIMBO’E SAN JUAN OMOMBE’U HÁICHA 5, 33-36
Peẽ peporandukava’ekue Juánpe, ha upe ha'e he'i va’ekue che rehe añeteguahína. Naikotevẽi jepe niko che mba'eve avave he'ívare. Ha'énte peẽme ko'ã mba'e ikatu haguã Tupã pene pysyrõ. Juan niko ojoguava’ekue ku mba'e rendýpe ohesapéva, ha peẽ katu pevy'ase sapy'ava’ekue hesapépe. Che katu areko peteĩ oñe'ẽ porãvéva che rehe Juángui. Upe che ajapóva nikohína, pe che Ru ome'ẽva’ekue chéve ajapo haguã, ha upéva ohechauka che Ru che mbou hague. Ha che Ru voi, pe che mbouhare, oñe'ẽ che rehehápe, jepe peẽ araka'eve napehendúiva chupe, térã pehecha chupe
Ñandejára Jesucristo Ñe’ẽ.
Fuente en Internet: http://jesuitas.org.py/
Enlace externo verificado y ON LINE a Abril 2013