ÑEMBO’E  ÑANEÑE’Ẽ  GUARANÍRE.

ÑE’ẼHAIHÁRA 

PEDRO ESCURRA  FRANCO

         Ñande Ruguasupavẽ reiméva yvágape, toñemombarete nde Réra yvy’ári pe yvagapeguáicha, rojerure Ndéve ñepytyvõ orepu’akahaḡua orerekovére, oreãngañe’ẽre, oñehẽva ore’ã mbytetégui. Oĩva moñáiko ombohypase  orehegui ore avañe’ẽ.

         Tove.! Tove.! Tove.!

         Ñande Ruguasupavẽ, reiméva yvágape, Ehendumína ore avañe’ẽ, Ema’ẽmína orerehe, Ndéko reñandúva ko oremba’embyasy osyrýva ore korasõgui avañe’ẽ  rupive. Heta mba’evaíma ojejapo ore ñe’ẽ guaraníre, ore yvýre, ore rekovére.

         Topa.!  Topa.!  Topa.!

         Ñande Ruguasupavẽme, oreñe’ẽme rojerure Ejokomína umi moñái guaraní jukahárape. Tojejoko umi tavy ha ñaña   añañemoñare oúva ombotujupahaḡua ñaneñe’ẽ guaraní.

            Tojejoko.! Tojejoko.!  Tojejoko.!

            Ñande Ruguasupavẽ, ropo’ose umi moñáigui, orerekoséva toryjárõ ha umi ipyguypekuéra. Tomano ñaña, ñañánte tomano. Ñande Ruguasupavẽme rojerure tomomba, tomombaite ko mba’evaiguasu ỹmaitéma  ojejapóva  orerehe.

         Tomano.! Tomano.! Tomano.!

         Kuarahy resẽre  oĩ  umi yvymarane’ỹrape. Ñande Ruguasupavẽ ohechuka ñandéve. Ñane ãngañe’ẽ oiporavo teko ñanemboguatáva. Ore guaraní ñemoñare rojerure ha rojerure Ñande Ruguasupavẽme, tojokojoko ore avañe’ẽ jukaharakuérape.

            Tojoko.! Tojoko.! Tojoko.!

            Ñande Ruguasupavẽ reiméva  pende yvágape. Heta ára oremokirirĩ umi ore retã  Paraguay ohayhu’ỹva. Pytagua omoinge iñe’ẽmarã omoambuese ore rekove ha omboguese avaé. Orepokuase, ore pykuaseve, ore kũñapytĩseve. Ko’áḡa  guaraní ñe’ẽ  oñembogue ohóvo mbeguekatumi tekombo’egui. Avei tekombo’e pererĩ ikangýma orehegui.

            Tove!  Tove!  Tove!.

            Pytagua ñe’ẽ oñembyái ha oñembotyái, oñeme’ẽhaḡua oréve guaraní ñe’ẽramo. Heta ára orepy’akavaipa. Ñaneñe’ẽ   ha  Ñanderekoteete oñemboyke. Guarani ñe’ẽ oñemosẽ  mbo’ehaógui, oñemosẽ ohóvo hetãgui.

            Anichéne!  Anichéne!  Anichéne!

            Ñande Ruguasupavẽ yvágape reiméva. Ore avañe’ẽ  oiko okupeguýre, umi tape’ykérupi, ogapýre jejahéi pa’ũre. Umi moñái oipota avañe’ẽ  omano aheñorei,   Umi  pokatuky’a ojopyvaíva guaraní ñe’ẽme. Toikovejey avañe’ẽ.  Tupã oreko Tupã roñe’ẽsemi oreavañe’ẽme.

            Toikovejey.!   Toikovejey.!   Toikovejey.!

            Ñande Ruguasupavẽ Ehendumína oreñe’ẽmi, orekorasõñe’ẽ  tesaýre oveve Nerendápe. Kuña ha Kuimba’e ohayhu iñe’ẽ. Péina ore ãngakuápe roñesũ ha roñepomoĩ Ndéve. Ehendumína oreñe’ẽ guaraníme rojerure  anivemahaḡua ojejahéi orerehe ha oreñe’ẽ guaraníre.

            Anivéna.! Anivéna.! Anivéna.!

            Ñande Ruguasupavẽ yvágape Reiméva, Ehendumína ore ãngañe’ẽ  ikatu’ỹva rojoko, guaraní rayhupápe roikóva rojerure opaichagua  pytyvõ, anivehaḡua ojekutu oreñe’ẽ  hetã Paraguaýpe. anihaḡua ojejuka, oreavañe’ẽ, anihaḡua oñembogue, anihaḡua opa ore avañe’ẽ porãite. Tupã oreko Tupã roñe’ẽsemi oreavañe’ẽme. Anihaḡua opa roñembo’e roñe’ẽmbo’e roñe’ẽmbo’e.

            Anihaḡua.! Anihaḡua.! Anihaḡua.!

PEDRO ESCURRA (peitoezkurra@gmail.com)

ENLACE INTERNO A ESPACIO DE VISITA RECOMENDADA

(Hacer click sobre la imagen)