CARLOS CLETO CAÑETE
ÑANE RETÃ RUVICHAITE PYPORE
Hai paapyha
PEDRO ESCURRA FRANCO
Carlos Cleto Cañete. Ñe’ẽpapára ha ñoha’ãnga’apohára. Joyke’y katupyry, Carlos Cleto Cañete. Mbo’ehára, ñe’ẽpapára ha ñoha’ãnga apohára. Ohohápe ha’e omoñe’ẽva ñane ñe’ẽpoty.
EPU’Ã JOYKE’Y EPU’Ã.
Ava Guaraní ãnga nerenói yvate guive. Nerembiapo nerenói joyke’y, nderehe oñeikotevẽ, guaraní ñe’ẽ nerenoijey, guaraní neñe’ẽ oikotevẽ nderehe, nerenói joyke’y.
Yvategua tanderovasa karai guasu. Kirito pórupive epu’ã joyke’y eguata porãite. Epu’ã joyke’y epu’ã.
Ehendu neñe’ẽ neñe’ẽme ndereka Yvategua. Nderehe ojeporeka, ndereka, nerenduse avei umi guaraní rayhuhára.
Umi nekorasõpoty rehaíva’ekue kuatiáre, ha’eténte ipotyjerajeýva kapelu mbo’ehára.
Néike joyke’y katupyry heta ára reikundaha umi avañe’ẽ rapepuku mbo’eharapavẽ David Galeano Olivera ndive, pemoĝuahẽhaĝua Ateneo de Lengua y Cultura Guaraní umi távape, tava’íre, tavavorérupi.
EPU’Ã JOYKE’Y EPU’Ã.
Umi penerembiapokue ipotyjera mayma ary pahápe, mbo’ehára pyahu mba’ekuaápe. Carlos Cleto Cañete, heta ára reñorairõ guaraní ñe’ẽre. Hetaite avei remyakã umi aty guaraní rérape ojejapóva ñane retãpýre. Epu’ã Carlos Cleto Cañete, epu’ãporãnte che irũ ñasẽ jaguata.
EPU’Ã JOYKE’Y EPU’Ã.
Mandu’a porãite rehejáva’ekue temimbo’ekuérape táva Pedro Juan Caballero ryepýpe, Casa de la Cultura, upe 12 jasypoteĩ 1997 árape. Opyta umi neremiandu ñe’ẽpotýre, temimbo’ekuéra apysápe umi neñe’ẽpoty porãite. Umi nderecha ha nerendúva’ekue ojeruréva nderehe, reĝuahẽjeyhaĝua táva Pedro Juan Caballero ryepýpe.
EPU’Ã JOYKE’Y EPU’Ã.
Mávapa oimo’ãta oĩha ñande rapicha ohayhuasýva guaraní ñe’ẽ, ahendu he’ihikuái, ñane retã rembe’ýpe, omomba’eguasúvo umi nerembiapo.
Yvategua tanderovasa karai guasu.
Kirito pórupive, epu’ãporãnte joyke’y eguata porãite.
EPU’Ã JOYKE’Y EPU’Ã.
Néike joyke’y eguata epu’ã, epu’ã jaha guaraní rayhupápe, guaraní rapykuéri. Ñane ñoha’ãnga guaraní nerenói, nde reikuaaporã nerembiapo ñoha’ãnga apytépe.
Epu’ãporãnte joyke’y epu’ã, Carlos Cleto Cañete, epu’ã. Nde avei ha’e ñe’ẽjára remboaguarakuaitéva avañe’ẽme umi kuñataĩme. Ñane retã Paraguay rayhupápe ha ñane avañe’ẽ rayhupápe. Epu’ãporãnte joyke’y epu’ã…
EPU’Ã JOYKE’Y EPU’Ã.
Guaraní róga nera’ãrõ, nera’ãrõ guaraní róga joyke’y Carlos Cleto Cañete. Epu’ãporãnte, eguata, jaha, eĝuahẽ avei nde rógape, pe guaraní rógape. Guarani ñe’ẽ tuichaiterei nemomaitei, tuichaiterei ndeguerohory ha ndeguerochichĩ joyke’y.
EPU’Ã JOYKE’Y EPU’Ã.
Ehupi neñe’ẽ toveve arapýre. Neñe’ẽ korochire Carlos Cleto Cañete tojupi yvate ohasakuévo tomoñe’ẽ Jasy ha Kuñáme avei umi mbyjápe. Eipyso nde pepo epu’ã eveve korochire arapýre ha ñane retãpýre. Nde ha’e mbo’ehára, ñane retã ao reipurukuaaitéva ndejehe, avei ku ojehecharamóva. Tetãygua imandu’a ryrúpe nde guerekóva ñe’ẽpapára umi mba’eporãpoty apytépe. Epu’ãporãnte joyke’y epu’ã,
Yvategua tenderovasa karai guasu. Kirito pórupive epu’ã joyke’y eguata porãite. Néike joyke’y epu’ã, eguata, jaha, guaraní róga akóinte nera’ãrõva. Nde mbo’ehára, rehohápe avave ndahesarái ndehegui, katuete ipotýva mandu’aporã nderehe.
EPU’Ã JOYKE’Y EPU’Ã.
Nde ha’e Carlos Cleto Cañete, pe karia’ýicha remoirũva’ekue ñane retãpýre, ñane mbo’eharapavẽme. Hetaite pehejáva’ekue mbo’ehao ra’ỹi, heñói ha okakuaahaĝua ha péina ko’áĝa 100 mbo’ehao guaraní ñane retãpýre ha heta avei pytagua retãre, ko yvyapu’a jerére.
Mombyry guive ñahendu arapyahu oĝuahẽha. Ñahendu avañe’ẽita aratirícha opu’ãva ojoka yvy, oheja tapepyahu rape, guaraní ñe’ẽme ipotypápa umi arandu ha umi mba’ekuaa. Epu’ã mbo’ehára Carlos Cleto Cañete ñahuĝuaitĩ ñane retã ñe’ẽme. Epu’ãporãnte joyke’y epu’ã,
EPU’Ã JOYKE’Y EPU’Ã.
Yvategua tenderovasa karai guasu. Kirito pórupive epu’ã joyke’y eguata porãite.
Ymaite guive nde rekove oñeme’ẽ guaraní ñe’ẽme ymaite guive. Guaraní rogaguýpe rejuhúta ha neañuãta katuete umi mbo’ehára, maiteirory ha py’arory apytépe umi guaraní rayhuhára nde pojopývo nerenyhẽne aguyjégui.
Epu’ã, epu’ã, eguata, eguata, jaha, jaha, guaraní rógape Carlos Cleto Cañete. Aguyje Mbo’ehára.
Yvategua tanderovasa karai guasu. Kirito pórupive epu’ã joyke’y eguata porãite. Epu’ãporãnte joyke’y epu’ã jaha guaraní rógape.!!!
ENLACE INTERNO A ESPACIO DE VISITA RECOMENDADA
CARLOS CLETO CAÑETE en PORTALGUARANI.COM
