MAITEI CHOKOKUE CHE RETÃYGUÁPE - Autor: ELPIDIO ALCARAZ SEGOVIA

MAITEI CHOKOKUE CHE RETÃYGUÁPE
 
Amomorã ne rembiapo che ryke’y kokueguára
nde ry’áipe remyakýva pe yvy pytã asy,
nde po iñanambusupa pytu’u reikuaa’ỹgui,
nde syvágui okukúi he’ẽmbochyva ysapy.
 
. Ko’ẽtĩvo tataypýpe ka’a rykue reipytéma
. rehekávo pe ytakúpe mbarete mba’aporã
. ha upéi py’aragẽme kuarahy osẽmboyvéma
. yvymbovoha ha nde guéi aje’íma oitypeka.
 
Reñotỹ guive yvyguýpe pe hi’áva’erã ko’ẽrõ
rereko nde py’aitépe hypyetéva ãngarõ
ha nga’únte upéicha hágui kogakuéra osẽ vaírõ
marõiténte pukavýpe po’ave reha’arõ.
 
. Rejerévo ne tapýime torýpe nera’arõva
. kuñami nemoirũhára ha mayma ne pehẽngue
. hesekuérante reikóva mba’apo ha jejopýpe
. opoñýgui nde retére guaraní ruguy añete.
 
Tetãygua ndererekóva ipy’a marangatúpe
oikuaágui rejapóva iporã, ndaijojahái,
Ejeitýke mba’apópe ha ejerure pe yvytúpe
toipeju umi nde kóga topu’ãve Paraguái.

.