MAMÓIKO REIME - Poesía de DAVID GALEANO OLIVERA

MAMÓIKO REIME

Poesía de DAVID GALEANO OLIVERA

DAVID GALEANO OLIVERA: Heñoiva'ekue Paraguaýpe, ára 18 jasykõi ary 1961-pe. Itúva héra Abdón Galeano Benítez ( ) ha isý Delia Olivera de Galeano. Oñemoarandu Paraguaýpe. Oiko ichugui Guarani ñe’ë mbo’ehára Instituto de Lingüística Guaraní ha ATENEO DE LENGUA Y CULTURA GUARANÍme ha avei Instituto Superior de Lenguas Universidad Nacional de Paraguaýpe-pegua. Omba’apo ATENEO-pe, sämbyhyhára ha mbo’ehára ramo ha upeichahápe oikundaha ñane retä omyasäivo ñane avañe’ë. Ohai ñe’ëpotymimi Guaraníme, ombyatýva peteï ñe’ëpotyryrúpe hérava “Temiandu Pytu”.

MAMÓIKO REIME

I

Mamóiko reime Kirito.

Roheka yvate ha ndorohechái,

Amaña Tupão ryepýpe ha nereiméi,

Aporandu che angirũme ha nandekuaái.

Roheka, roheka ha

Peichavérõ jepe, ndorojuhúi.

Mamóiko reime Kirito

II

Aipóna oguahẽ ne aramboty

Ha nde nereiméi

Ñorairõ, kate, tesarái,

Pirapire, tarova,

Ko’ãva nemyengovia

Mamóiko reime Kirito.

Aipóna oguahẽ ne aramboty

Ha nde nereiméi

III

Che rapichakuéra oñembosako’íma

Ayvúpe reñeha’ãrõ

Guari, tembi’ueta, jopói hepyete,

Ka’u, tyguatã, jerovia,

Peteĩ hendápe imbaretejoa.

Ñembyahýi, sogue, tyre’ỹ,

Mba’asy, kyhyje,

Yty ramoguáicha ambue hendápe oime ojo’apa

Mamóiko reime Kirito.

Che rapichakuéra oñembosako’íma

Ayvúpe reñeha’ãrõ.

IV

Ndaupeichaiva’ekue.

Tuicha iñambue ore rekove.

Nde niko heta reguata ha heta rejapo,

Oparupirei reju ha reho mba’everõguáicha.

Mba’éichapiko, nde, péichaite peve

Rejepokuaa porãite,

Hasyetépiko oréve, ko’ága, rohapykueho...

Ndaupeichaiva’ekue.

Tuicha iñambue ore rekove.

(22 jasypakõi 1988)

.

Espacio web:

http://wapedia.mobi/gn/%C3%91e%27%E1%BA%BDpoty_Guaranime

(Link caduco, revisado en Febrero de 2024)

Fuente: Ohai DAVID A. GALEANO OLIVERA

(ATENEO DE LENGUA Y CULTURA GUARANI)

.

GALERÍA RECOMENDADA

GALERÍA DE MITOS Y LEYENDAS DEL PARAGUAY

ENLACE INTERNO A ESPACIO DE VISITA RECOMENDADA

GALERÍA DE LITERATURA, HISTORIA Y MÚSICA